- Auglýsing -
- Aron Pálmarsson skoraði eitt mark í þremur skotum í gær þegar Barcelona vann Ademar León, 36:25, í spænsku 1. deildinni í handknattleik en leikið var á heimavelli Barcelona. Katalóníuliðið var 10 mörkum yfir að loknum fyrir hálfleik, 21:11. Mamadou Lamine Diocou og Aleix Gómez Abelló voru markahæstir hjá Barcelona með fimm mörk. Dika Mem og Ludovic Fabregas skoruðu fjögur mörk hvor.
- Barcelona er sem fyrr efst í deildinni með 28 stig eftir 14 leiki. Bidasoa Irun er í öðru sæti með 20 stig að loknum 13 leikjum. La Rioja með 19 stig og Admar León hefur 18 stig.
- Jürgen Schweikardt, þjálfari Stuttgart sem Elvar Ásgeirsson og Viggó Kristjánsson leika með, hefur greinst öðru sinni með kórónuveiruna. Hann verður þar af leiðandi ekki á hliðarlínunni í dag þegar Stuttgart sækir Wetzlar heim í þýsku 1. deildinni í handknattleik. Schweikardt hefur farið í tvær skimanir í vikunni og reynst jákvæður í bæði skiptin. Hann var einnig greindur með veiruna í september, áður en keppnistímabilið hófst.
- Danski landsliðsmarkvörðurinn Rikke Poulsen hefur skrifað undir nýjan samning við meistaraliðið Esbjerg. Nýi samningurinn gildi fram á mitt árið 2022. Poulsen kom til Esbjerg sumarið 2019.
- Norsku markverðirnir Katerine Lunde og Silja Solberg eru komnar til Kolding og báðar hafa verið skimaðar og reynst vera neikvæðar. Solberg er nýkomin úr nærri þriggja vikna einangrun eftir að hafa smitast af kórónuveirunni. Lunde og Solberg voru á meðal fámenns hóps áhorfenda í gærkvöld þegar norska landsliðið tók það þýska í karphúsið í annarri umferð D-riðils, 42:23.
- Auglýsing -
