- Auglýsing -
- Gísli Þorgeir Kristjánsson, Magdeburg, og Hákon Daði Styrmisson hornamaður Gummersbach eru báðir í liði 16. umferðar þýsku 1.deildarinnar í handknattleik. Þetta er í fyrsta sinn sem Hákon Daði á sæti í úrvalsliði deildarinnar.
- Jakob Lárusson þjálfari kvennaliðs Kyndils í Þórshöfn í Færeyjum er kominn með lið sitt í undanúrslit færeysku bikarkeppninnar í handknattleik kvenna. Átta liða úrslitum lauk um nýliðna helgi. Um leið hefur verið dregið til undanúrslita. Kyndill mætir Stjørnan og H71 og Neistin eigast við í hinni viðureign undanúrslita sem leikin verða 25. febrúar.
- Egill Már Hjartarson og Viktor Máni Matthíasson og samherjar í StÍF leika einnig til undanúrslita í færeysku bikarkeppninni. StÍF leikur við KÍF frá Kollafirði í undanúrslitum. Í hinni viðureign undanúrslita eigast við VÍF frá Vestmanna og H71 frá Hoyvik sem er ríkjandi bikarmeistari í karlaflokki.
- Katrine Lunde og Anna Vyakhireva skrifuðu í gær undir nýja tveggja ára samning við Evrópu- og Noregsmeistara Vipers. Lunde er 42 ára gömul hefur leikið með Vipers í fimm ár. Hún hefur sett stefnuna á að leika með með norska landsliðinu á Ólympíuleikunum sumarið 2024.
- Vyakhireva er rússneskt landsliðskona sem kom til Vipers í sumar og líkar vel við lífið í Noregi.
- Danski landsliðsmaðurinn Mathias Gidsel hefur framlengt samning sinn við Füchse Berlin til ársins 2028. Gidsel kom til Berlínarliðsins í sumar eftir að hafa orðið danskur meistari með GOG í vor.
- Hrvoje Horvat hefur verið ráðinn þjálfari þýska handknattleiksliðsins Wetzlar til loka leiktíðar. Hann kemur nú þegar til starfa þótt framundan sér heimsmeistaramót í næsta mánuði þar sem Horvat verður í eldlínunni við stjórn króatíska karlalandsliðsins.
- Spánverjinn Xavi Pascual hefur skrifað undir nýjan samning við stjórnendur Dinamo Búkarest um að þjálfa meistaraliðið fram til ársins 2026. Pascual er sigursælasti þjálfari í sögu Barcelona en hætti óvænt þjálfun liðsins 2021 og samdi við Dinamo. Pascual hefur verið orðaður við PSG en ljóst má vera að bið verður á að hann fari til Parísar til þess að þjálfa.
- Auglýsing -
