- Auglýsing -
- Gísli Þorgeir Kristjánsson er í liði 26. umferðar þýsku 1. deildarinnar eftir stórleik sinn með SC Magdeburg gegn THW Kiel, 34:34, á sunnudaginn. Gísli Þorgeir skoraði átta mörk í leiknum í tíu tilraunum og gaf sex stoðsendingar.
- Barcelona er spænskur meistari í handknattleik karla í 2023. Þetta er þrettánda árið í röð sem félagið vinnur titilinn. Allt í allt hefur Barcelona orðið spænskur meistari í 30 skipti. Eins og undanfarin ár hefur Barcelona haft yfirburði og unnið hvern einasta leik til þessa á keppnistímabilinu með að jafnaði 12 marka mun.
- Ágúst Elí Björgvinsson markvörður danska úrvalsdeildarliðsins Ribe-Esbjerg og íslenska landsliðsins er 28 ára gamall í dag. Ágúst gekk til liðs við danska úrvalsdeildarliðið Ribe-Esbjerg á síðasta ári eftir tveggja ára veru hjá Kolding. Hann lék veigamikið hlutverk hjá liðinu í deildakeppninni sem lauk á miðvikudaginn fyrir páska með því að Ribe-Esbjerg tókst að tryggja sér sæti í átta liða úrslitum um danska meistaratitilinn í fyrsta sinn um nokkurra ára skeið. Ágúst Elí hefur leikið 48 landsleiki og skorað í þeim tvö mörk. Handbolti.is óskar Ágústi til hamingju með afmælið.
- Fyrri leikir átta liða úrslita Evrópudeildarinnar í handknattleik fara fram í dag. Þrír Íslendingar verða í eldlínunni í leikjunum. Teitur Örn Einarsson er kominn til Spánar með samherjum sínum í Flensburg. Þeir mæta Granolles.
- Aðalsteinn Eyjólfsson stýrir sínum mönnum í Kadetten Schaffhausen á heimavelli gegn þýska liðinu Füchse Berlin. Óðinn Þór Ríkharðsson er leikmaður Kadetten og markahæsti leikmaður liðsins í Evrópudeildinni.
- Í hinum tveimur viðureignum átta liða úrslita Evrópudeildar karla mætast annars vegar Sporting Lissabon og Montpellier og hins vegar Göppingen, sem sló út Val í 16-liða úrslitum, og Nexe frá Króatíu.
- Til viðbótar fara tveir leikir fram fram í umspili um sæti á HM kvenna í dag. Landslið Úkraínu tekur á móti landsliði Norður Makedóníu í Kisvarda í Ungverjalandi. Einnig mætast landslið Tékklands og Sviss í Brno í Tékklandi. Úkraína vann fyrri leikinn við Norður Makedóníu, 24:22, og Tékkar mörðu sigur í Sviss, 32:31, í fyrri viðureigninni.
- Auglýsing -
