- Auglýsing -
- Gísli Þorgeir Kristjánsson og Ómar Ingi Magnússon ásamt félögum í SC Magdeburg mæta HC Erlangen í undanúrslitum þýsku bikarkeppninnar 23. apríl. Ekki liggur alveg fyrir hvaða lið mætast í hinni viðureign undanúrslitanna. Víst er þó að Kiel mætir annað hvort ríkjandi bikarmeisturum Lemgo, sem Bjarki Már Elísson leikur með, eða MT Melsungen.
- Þrír Íslendingar eru í herbúðum Melsungen, Alexander Petersson, Arnar Freyr Arnarsson og Elvar Örn Jónsson. Fresta varð undanúrslitaleik Melsungen og Lemgo sem fram átti að fara á síðasta sunnudag vegna smita meðal leikmanna Melsungen.
- Sem fyrr segir fara undanúrslitaleikirnir fram 23. apríl. Úrslitaleikurinn fer fram daginn eftir. Leikir undanúrslita og úrslita fara fram í Hamborg.
- Ágúst Elí Björgvinsson og samherjar í KIF Kolding töpuðu naumlega fyrir SönderjyskE, 29:28, á útivelli í hörkuleik í dönsku úrvalsdeildinni í handknattleik í gærkvöld. Ágúst Elí stóð í marki Kolding u.þ.b. helming leiksins og varði fimm skot, 23%. Kolding er í 12. sæti með 12 stig eftir 19 leiki í deildinni.
- Steinunn Hansdóttir kom ekkert við sögu í liði Skanderborg þegar liðið tapaði á útivelli fyrir Holstebro, 36:28, í úrvalsdeild kvenna í Danmörku. Skanderborg er í 10. sæti af 14 liðum deildarinnar með 11 stig þegar 19 leikjum liðsins af 26 er lokið.
- Raúl Alonso tekur formlega við þjálfun HC Erlangen í þýsku 1. deildinni en hann hefur verið íþróttastjóri liðsins síðan á síðasta sumri. Í byrjun janúar tók hann við þjálfun liðsins samhliða starfi íþróttastjóra eftir að Michael Haaß þjálfari var látinn taka pokann sinn.
- Alonso er þrautreyndur þjálfari. Hann var aðstoðarmaður Alfreðs Gíslasonar hjá Kiel frá 2010 til 2015. Eftir það tók Alonso við þjálfun Innsbruck í Austurríki frá 2015 til 2018 og loks Brest í Hvíta-Rússlandi frá 2018 þangað til á síðasta sumri. Landsliðsmaðurinn Sveinn Jóhannsson gengur til liðs við HC Erlangen í sumar.
- Auglýsing -
