- Auglýsing -
- Gísli Þorgeir Kristjánsson er í liði marsmánaðar í þýsku 1. deildinni í handknattleik. Hann er annar tveggja leikmanna SC Magdeburg í úrvalsliðinu. Hinn er örvhenta skyttan Kay Smits.
- Viktor Gísli Hallgrímsson varði sex skot þann tíma sem hann stóð í marki Nantes í gær í sigri á Istres, 37:35, á útivelli í frönsku 1. deildinni í handknattleik. Nantes er í þriðja sæti með 37 stig að loknum 22 leikjum. Montpellier er efst með 40 stig. Átta umferðir eru eftir óleiknar.
- Daníel Þór Ingason skoraði þrjú mörk og átti eina stoðsendingu og Oddur Gretarsson skoraði tvö mörk úr vítaköstum þegar lið þeirra Balingen-Weilstetten vann Wölfe Würzburg, 29:22, í þýsku 2. deildinni í handknattleik í gær. Balingen-Weilstetten er sem fyrr í efsta sæti. Liðið hefur 47 stig og er fjórum stigum á undan TuS N-Lübbecke.
- Egill Már Hjartarson skoraði fimm mörk þegar lið hans StÍF vann KÍF frá Kollafirði, 31:28, í lokaumferð færeysku úrvalsdeildarinnar í gær. Leikurinn fór fram í Kollafirði. StÍF hafnaði í fjórða sæti deildarinnar með 19 stig í 18 leikjum, stigi á eftir Kollafjarðarliðinu. VÍF frá Vestmanna varð deildarmeistari með 30 stig. H71 varð að gera sér annað sætið að góðu með 23 stig.
- StÍF mætir Neistanum í átta liða úrslitum úrslitakeppninnar um færeyska meistaratitilinn.
- Daninn Casper U. Mortensen hefur framlengt samning sinn við HSV Hamburg til ársins 2026. Mortensen kom til félagsins fyrir tveimur árum eftir þyrnum stráða dvöl hjá Barcelona. Meiðsli settu stórt strik í reikninginn hjá honum. Mortensen hefur náð sér vel á strik með Hamborgarliðinu og er nú um stundir markahæsti leikmaður þýsku 1. deildarinnar.
- Auglýsing -
