- Auglýsing -
- Guðjón L. Sigurðsson var eftirlitsmaður í Ystad í gærkvöld á viðureign Ystads og Flensburg í B-riðli Evrópudeildarinnar í handknattleik. Heimamenn unnu leikinn með fjögurra marka mun, 30:26. Dómarar komu frá Bosníu.
- Þátttaka dönsku handknattleikskonunnar Helena Elver í leik með liði sínu Odense Håndbold gegn Nykøbing Falster í úrvalsdeildinni á sunnudaginn var tilfinningaþrungin. Hún hafði þá ekki leikið handknattleik í 732 daga og hélt um skeið á þeim tíma að ferlinum væri lokið. Elver, sem átti að leika með danska landsliðinu á EM 2020, sleit krossband í annað sinn á ferlinum rétt fyrir mótið. Í lok september í fyrra þegar Elver sá fram á að geta byrjað að leika með Odense á nýjan leik sleit hún krossband í þriðja sinn.
- Elver, sem er 24 ára gömul, segir í samtali við danska fjölmiðla að fyrir rúmu ári hafi hún velt því fyrir sér í alvöru hvort ferlinum væri lokið. Hún hafi ákveðið að láta slag standa og fara í gegnum þriðju aðgerðina og endurhæfinguna. Elver lék með í 10 mínútur í leiknum á sunnudaginn og skal engan undra þótt hún hafi beygt af í samtali við TV2 eftir leikinn.
- Sænski markvörðurinn Mikael Appelgren hefur skrifað undir nýjan samning við Rhein-Neckar Löwen sem gildir fram á mitt árið 2026. Appelgren, sem er 33 ára gamall, hefur verið afar óheppinn með meiðsli undanfarin tvö ár en virðist vera á góðri leið til baka.
- Steffen Weinhold leikur ekki með THW Kiel næstu þrjá mánuði eftir að hafa meiðst í vinstra hné undir lok viðureignar Kiel og Gummersbach á sunnudaginn.
- Túnisbúinn Wael Jallouz hefur lagt keppnisskóna á geymsluhilluna aðeins 31 árs að aldri eftir að hafa glímt við þrálát meiðsli um langt skeið. Jallouz var vonarstjarna á handknattleikssviðinu fyrir nokkrum árum og lék m.a. með THW Kiel og Barcelona en náði aldrei að verða sú stjarna sem vonir stóðu til. Hann lék síðast með Espérance Sportive de Tunis.
- Auglýsing -
