Guðmundur Bragi Ástþórsson skoraði þrjú mörk úr vítaköstum og var með fullkomna nýtingu þegar lið hans Bjerringbro/Silkeborg vann Nordsjælland, 31:28, útivelli í upphafsleik 21. umferðar dönsku úrvalsdeildinni í handknattleik í gærkvöld. Bjerringbro/Silkeborg er í fjórða sæti deildarinnar með 25 stig eins og Skanderborg AGF. Síðarnefnda liðið á leik til góða.
Lars Jørgensen, sem verið hefur aðstoðarþjálfari danska kvennalandsliðsins síðustu sjö ár, verður landsliðsþjálfari í næsta verkefni landsliðsins sem er þátttaka í fjögurra landa móti í Hollandi í vikunni. Jepser Jensen, sem verið hefur landsliðsþjálfari, sagði sig frá starfinu vegna veikinda eiginkonu sinnar.
Jensen og Jørgensen hafa sagt starfi sínu lausu frá og með vorinu eins og handbolti.is hefur sagt frá. Jensen tekur við þjálfun ungversku bikarmeistarana FTC en Jørgensen hverfur af íþróttasviðinu og hefur ráðið sig til fyrirtækis utan íþróttahreyfingarinnar.
Danski landsliðsmaðurinn Rasmus Lauge leikur hugsanlega ekki fleiri leiki með Bjerringbro/Silkeborg né landsliðinu það sem eftir er leiktíðar. Tilkynnt var í gærkvöld fyrir leik Nordsjælland og Bjerringbro/Silkeborg í dönsku úrvalsdeildinni að Lauge væri kominn í leyfi um ótiltekinn tíma af fjölskylduástæðum.
