- Auglýsing -
- Halldór Jóhann Sigfússon tók við þjálfun danska úrvalsdeildarliðsins Nordsjælland í byrjun mánaðarins. Fyrsta æfing liðsins í sumar var í fyrradag en liðin í Danmörku er eitt af öðru að hefja undirbúning fyrir næsta tímabil. Ekki veitir af því fyrstu leikirnir verða í lok ágúst.
- Halldór Jóhann þjálfaði Team Tvis Holstebro í sömu deild á síðasta tímabili en lauk eins árs samningi sínum við félagið í vor. Arnór Atlason er nú þjálfari Team Tvis Holstebro. Halldór Jóhann og Arnór voru eitt sinn samherjar hjá KA fyrir um tveimur áratugum.
- Hin þrautreynda handknattleikskona, Camilla Herrem, er komin í norska landsliðið í handknattleik á nýjan leik. Hún átti sitt annað barn í mars og var þar af leiðandi ekki með norska landsliðinu á EM í nóvember sl. Norska landsliðið er við æfingar þessa dagana og mætir franska landsliðinu í vináttuleik í Bodø Spektrum á laugardaginn. Æfingabúðir beggja landsliða þessa dagana eru liður í fyrsta undirbúningi þeirra fyrir heimsmeistaramótið sem hefst í lok nóvember.
- Herrem er 36 ára gömul og lék fyrst með norska landsliðinu fyrir 17 árum. Hún hefur leikið 288 landsleiki og skorað í þeim 822 mörk. Herrem lék aðeins með félagsliði sínu, Sola, undir lok keppnistímabilsins í vor.
- Sigurbergur Sveinsson fyrrverandi landsliðsmaður í handknattleik og Íslandsmeistari með Haukum og ÍBV auk annars, varð klúbbmeistari Golfklúbbs Vestmannaeyja. Meistaramótinu lauk á laugardaginn. Sigurbergur vann Andra Erlingsson (Richardsson) í bráðabana um meistaratitilinn. Úrslit réðust ekki fyrr en á sjöttu holu.
- Talsverðar breytingar hafa átt sér stað hjá hinu fornfræga félagi Vardar í Skopje í Norður Makedóníu sem m.a. vann meistaradeild Evrópu 2017 og 2019. Borko Ristovski, markvörður, og Stole Stoilov línumaður, hafa ákveðið að leggja skóna á hilluna eftir langan og farsælan feril. Stoilov kemur inn í þjálfarateymi félagsins en Ristovski kemur að stjórninni. Mihajlo Mihajlovski forseti félagsins til síðustu margra ára hefur dregið sig í hlé. Í hans stað kemur Emil Ugrinovski. Von mun vera á hið minnsta sex nýjum leikmönnum til félagsins. Fjórir leikmenn hafa horfið á braut frá síðasta tímabili.
- Þau tíðindi bárust í gær að króatíska meistaraliðið RK Zagreb hafi endurnýjað samning sinn við þjálfarann Slavko Goluza. Hann kom til félagsins á síðasta tímabili. Afar mikið los hefur verið á þjálfaramálum félagsins og á annan tug þjálfara hefur verið við stjórnvölin undanfarin áratug, sumir staldra stutt við. Þar á meðal Goluza síðast þegar hann var kallaður til starfa hjá félaginu.
- Auglýsing -
