- Auglýsing -
- Hannes Jón Jónsson og lærisveinar hans í Alpla Hard gerðu í gær jafntefli við West Wien, 26:26, á heimavelli í austurrísku 1. deildinni í handknattleik. Alpla Hard var þremur mörkum undir að loknum fyrri hálfleik, 14:11. Alpla Hard, Krems og Aon Fivers eru jöfn með 10 stig í efstu þremur sætum deildarinnar. Bregenz er þar á eftir með níu stig
- Þess má til fróðleiks geta að Hannes Jón þjálfaði lið West Wien frá 2015 til 2019.
- Teitur Örn Einarsson skoraði ekki mark þegar lið hans IFK Kristianstad vann Hallby, 32:21, á heimavelli í sænsku úrvalsdeildinni í handknattleik í gær. IFK Kristianstad færðist upp í þriðja sæti deildarinnar með þessum sigri. Liðið er með átta stig að loknum sex leikjum og er tveimur stigum á eftir Alingsås sem er efst með 10 stig.
- Skarð er fyrir skildi hjá franska handknattleiksliðinu Nantes nú þegar danski markvörðurinn Emil Nielsen er meiddur. Hann verður frá keppni að minnsta kosti fram í nóvember sem er talsvert áfall fyrir Nantes sem ekki hefur farið vel af stað í frönsku 1. deildinni. Nielsen hefur verið frábær í marki liðsins síðustu þrjú ár. Hann var sá leikmaður Nantes sem átti hvað stærstan þátt í að Nantes komst alla leið í úrslitahelgi Meistaradeildar Evrópu í vor. Nielsen hættir hjá Nantes eftir keppnistímabilið og mun Viktor Gísli Hallgrímsson taka stöðu hans eins og staðfest var í byrjun september.
- Auglýsing -
