- Auglýsing -

Molakaffi: Harpa, Sunna, Egill, Jakob, Petrov, Alfreð

Scandinavium íþróttahöllin í Gautaborg á föstudagskvöldið. Mynd/Hafliði Breiðfjörð
  • Harpa Rut Jónsdóttir skorað fjögur mörk fyrir lið sitt GC Amicitia Zürich í gær í þriggja marka sigri á HSC Kreuzlingen, 26:23, í svissnesku A-deildinni í handknattleik í gær. Sunna Guðrún Pétursdóttir varði 8 skot í marki GC Zürich, 30%, þann tíma sem hún fékk að spreyta sig. GC Amicitia Zürich er í sjötta sæti deildarinnar með 12 stig eftir 13 leiki. 
  • Keppni í færeysku úrvalsdeildinni  í karlaflokki er komin á fulla ferð eftir ríflega mánaðar hlé. Egill Már Hjartarson skoraði þrjú mörk fyrir StÍF í öruggum sigri liðsins á heimavelli þegar leikmenn Kyndils komu í heimsókn, 29:21. Egill Már skoraði í tvígang fyrir StÍF í tapi fyrir Neistanum rétt fyrir helgina, 28:26, þegar leikið var í Þórshöfn. Victor Máni Matthíasson, sem einnig gekk til liðs við StÍF fyrir tímabilið, er hinsvegar hættur og fluttur heim til Íslands. Hann hefur byrjað æfingar á nýjan leik með Fjölni. 
  • Jakob Lárusson fagnaði góðum sigri með leikmönnum sínum í Kyndli þegar liðið lagði VB, 35:14, á heimavelli á föstudagskvöld í úrvalsdeild kvenna í Færeyjum. Kyndill er í öðru sæti deildarinnar með 21 stig eftir 14 leiki, er tveimur stigum á eftir H71 sem á þess tvo leiki til góða. Jakob tók við þjálfun Kyndils fyrir tímabilið. 
  • Kostadin Petrov, línumaður Þórs, var í liði Norður Makedóníu í gær þegar liðið tapaði óvænt fyrir Túnis í annarri umfeð í forsetabikarnum á HM í handknattleik, 33:28. Petrov skoraði ekki mark í leiknum. Tapið kemur hugsanlega í veg fyrir að Norður Makedóníuliðið vinni keppnina eins og stefnt var að. Úrslit og stöðu í riðlum í keppninni um forsetabikarinn er að finna hér
  • Alfreð Gíslason og hans menn í þýska landsliðinu halda sínu striki og vinna hvern leikinn á fætur öðrum á heimsmeistaramótinu í handknattleik karla. Í gær lagði þýska landsliðið það hollenska örugglega, 33:26. Ljóst er að á mánudaginn verður úrslitaleikur á milli Þýskalands og Noregs um efsta sætið í milliriðli þrjú á HM. Lið beggja þjóða eru örugg áfram í átta liða úrslit og mæta Frakklandi og Spáni sem komin eru áfram úr riðli eitt þótt lokaumferðin sé eftir. 
  • Norðmenn lögðu Katar, 30:17, á HM í gær. Lið Katar virðist heillum horfið á þessu móti eftir að hafa staðið nokkuð vel í mörgum Evrópuþjóðum á undanförnum árum.

HM 2023 – Milliriðlar, leikjadagskrá, staðan

- Auglýsing -
- Auglýsing -

Nýjustu fréttir

- Auglýsing -