- Auglýsing -

Molakaffi: Hildigunnur, Cupic, Bramming og Blonz

Hildigunnur Einarsdóttir leikmaður Bayer Leverkusen. Mynd/TSV Bayer Leverkusen
  • Hildigunnur Einarsdóttir skoraði tvö mörk í gær þegar lið hennar, Bayer Leverkusen, tapaði fyrir Oldenburg, 26:22, í þýsku 1.deildinni í handknattleik. Hildigunnur glímir við erfið meiðsli í hné og fer í aðgerð þess vegna um næstu mánaðarmót eins og kom fram á handbolti.is á dögunum. Hún ætlar að þrauka í gegnum næstu leiki fram að mánaðarmótum en í lok mánaðins leikur Leverkusen mikilvægan leik í átta liða úrslitum bikarkeppninnar sem allt kapp er lagt á að vinna. Leverkusen er í sjötta sæti með 16 stig eftir 13 leiki. 
  • Króatíski handknattleiksmaður Ivan Cupic yfirgefur Vardar í Norður-Makedóníu við lok leiktíðar. Cupic hefur ákveðið að ganga til liðs við RK Zagreb í heimalandi sínu. 

  • Magnus Bramming hefur verið kallaður inn í danska landsliðið í handknattleik karla sem leikur á heimsmeistaramótinu í Egyptalandi. Hann kemur til Kaíró í dag og á að hlaupa í skarðið fyrir Emil Jakobsen sem greindist smitaður af kórónuveirunni fljótlega eftir komu danska landsliðsins til Egyptalands á dögunum. Bramming á að baki 13 landsleiki og var í EM-liði Dana fyrir ári. 
  • Meiðsli norska hornamannsins unga, Alexander Blonz, eru ekki eins alvarleg og talið var í fyrstu. Hann getur því haldið sínu striki með norska landsliðinu á HM. Óttast var í fyrstu að hann væri úr leik í keppninni en Blonz meiddist í upphitun fyrir leik Noregs og Sviss í fyrradag.
- Auglýsing -
- Auglýsing -

Nýjustu fréttir

- Auglýsing -