- Auglýsing -
- Hilmar Bjarki Gíslason og Ísak Óli Eggertsson skrifuðu í gær undir tveggja ára samning við handknattleiksdeild KA. Báðir koma þeir upp úr yngri flokka starfi Akureyrarliðsins.
- Vilborg Pétursdóttir fyrrverandi handknattleikskona hjá Haukum skoraði tvö mörk þegar lið hennar, AIK, tapaði fyrir IK Sävehof í þriðju og síðustu umferð 1. riðils 32 liða úrslita sænsku bikarkeppninnar í gærkvöld, 46:28. Mikil markaveisla í Partille. AIK leikur í næst efstu deild en Sävehof er ríkjandi Svíþjóðarmeistari.
- Bjarki Már Elísson lék ekki með Veszprém í gær þegar liðið vann Balatonfuredi, 35:24, á heimavelli í upphafsleik ungversku 1. deildarinnar í handknattleik. Bjarki Már er lítillega meiddur um þessar mundir eftir því sem ungverska liðið greindi frá á samfélagsmiðlum sínum.
- Elías Már Halldórsson og lið hans, Fredrikstad Bkl, komst örugglega áfram í aðra umferð norsku bikarkeppninnar í handknattleik kvenna í gær. Fredrikstad Bkl. vann Tveter, 49:14, á útivelli. Alexandra Líf Arnarsdóttir var ekki í leikmannahópi Fredrikstad Bkl. sem mætir Volda í fyrstu umferð norsku úrvalsdeildinni á sunnudaginn.
- Dansk/færeyski handknattleiksmaðurinn Johan Hansen leikur ekki með Flensburg á upphafsvikum þýsku 1. deildarinnar vegna meiðsla. Hann meiddist á dögunum og var ekki með liðinu á æfingamóti í Veszprém í Ungverjalandi fyrir og um síðustu helgi. Teitur Örn Einarsson leysti hann af á mótinu og verður væntanlega eitthvað í því hlutverki á næstunni. Hansen kom til Flensburg í sumar og á að fylla skarð Lasse Svan Hansen sem hætti eftir langan og sigursælan feril. Flensburg sækir Hamburg heim í 1.umferð þýsku 1.deildarinnar í kvöld.
- Auglýsing -
