- Auglýsing -
- Olivera Kecman tekur við þjálfun danska handknattleiksliðsins Vendsyssel sem Elín Jóna Þorsteinsdóttir og Steinunn Hansdóttir leika með. Liðið féll á dögunum úr dönsku úrvalsdeildinni og þar með fékk þjálfari liðsins að taka pokann sinn. Var það annar þjálfari liðsins á leiktíðinni sem mátti sætta sig við það hlutskipti.
- Synna Lien, sem hefur verið markvörður Vendsyssel ásamt Elínu Jónu á leiktíðinni, hefur ákveðið að róa á önnur mið eftir að keppnistímabilinu lýkur en Vendsyssel leikur síðasta leik sinn í úrvalsdeildinni í kvöld þegar lokaumferðin fer fram. Elín Jóna hefur staðið sig vel á leiktíðinni og var m.a. valin í lið 22. umferðar dönsku úrvalsdeildarinnar á dögunum.
- Andrea Jacobsen náði sér ekki á strik í gærkvöld þegar Kristianstad tapaði fyrir Skuru, 28:22, í lokaumferð sænsku úrvalsdeildarinnar í handknattleik. Andrea, var að leika sinn annan leik á skömmum tíma, eftir 13 mánaða fjarveru vegna krossbandsslits, skoraði ekki mark í leiknum þrátt fyrir nokkrar skottilraunir. Kristianstad hafnaði í fimmta sæti deildarinnar. Það lá fyrir áður en kom að leiknum í gær. Skuru varð deildarmeistari.
- Andrea og samherjar mæta Skara HF í átta liða úrslitum. Fyrsti leikur liðanna verður á föstudaginn en önnur umferð verður 12 dögum síðar vegna hlés á úrslitakeppninni vegna þátttöku sænska landsliðsins í forkeppni Ólympíuleikanna um aðra helgi.
- Danska landsliðskonan Rikke Iversen verður ekki með Odense Håndbold í síðari viðureigninni við norsku meistarana í Vipers um næstu helgi í 16-liða úrslitum Meistaradeildarinnar. Hún handarbrotnaði í fyrri viðureigninni um síðustu helgi. Odense vann þá viðureign með eins marks mun, 36:35.
- Landi Iversen, Rasmus Lauge, hefur skrifað undir nýjan þriggja ára samning við Veszprém. Lauge sleit krossband síðla á síðasta ári og gat þar af leiðandi ekki leikið með danska landsliðinu á HM í Egyptalandi. Lauge kom til Veszprém fyrir tveimur árum frá Flensburg.
- Danski handknattleiksþjálfarinn Helle Thomsen er hætt þjálfun Kastamonu Belediyesi GSK í Tyrklandi. Hún tók við þjálfun liðsins á síðasta sumri. Thomsen hefur víða þjálfað á ferlinum, m.a. landslið Hollands og Svíþjóðar, Midtjylland í heimalandi sínu, Molde í Noregi og CSM Búkarest.
- Auglýsing -
