- Auglýsing -
- Áhorfendamet verður sett á deildarleik í norska karla handknattleiknum á laugardaginn þegar meistarar Elverum sækja Kolstad heim í Trondheim Spektrum í norsku úrvalsdeildinni. Þegar hafa verið seldir 7.600 aðgöngumiðar og er talið afar sennilegt að hið minnsta 9.000 miðar seljist áður en leikurinn hefst. Metið er 7.013 miðar seldir á einn frá 2019 þegar Kolstad og Elverum mættust í Trondheim Spektrum. Janus Daði Smárason og Sigvaldi Björn Guðjónsson leika með Kolstad og Orri Freyr Þorkelsson er leikmaður Elverum.
- Eins og kom fram á handbolti.is á mánudagsmorgun meiddist danski handknattleiksmaðurinn, Mathias Gidsel, á fingri í viðureign Dana og Svía á sunnudaginn í Gautaborg. Gidsel verður frá keppni í hálfan þriðja mánuð af þessum sökum, eftir því sem danskir fjölmiðlar greindu frá í gær.
- Evrópumeistarar Barcelona skoruðu 50 mörk er liðið vann Club Ministros frá Mexíkó í fyrstu umferð heimsmeistaramóts félagsliða í Dammam í Sádi Arabíu í gær. Mexíkóarnir skoruðu 18 mörk. Spænski prinsinn, Pablo Urdangarin, skoraði 12 mörk fyrir Barcelona. Pablo er sonur Iñaki Urdangarin fyrrverandi leikmanns Barcelona og Kristínar dóttur Jóhanns Karls fyrrverandi Spánarkonungs og Soffíu eiginkonu hans.
- Ungverska handknattleikskonan, Nóemi Háfra, leikur ekki fleiri leiki með danska meistaraliðinu Odense Håndbold á leiktíðinni. Háfra varð fyrir því óláni að slíta krossband í hné í viðureign Odense og Brest í Meistaradeild kvenna á laugardaginn. Háfra kom til danska liðsins í sumar. Einnig er ljóst að hún verður ekki með ungverska landsliðinu á EM í næsta mánuði.
- Auglýsing -
