- Auglýsing -
- Íslendingaslagur verður í undanúrslitum dönsku bikarkeppninnar 18. febrúar þegar Skjern, sem Sveinn Jóhannsson leikur með, mætir Ribe-Esbjerg. Með síðarnefnda liðinu leika Arnar Birkir Hálfdánsson, Ágúst Elí Björgvinsson og Elvar Ásgeirsson. Bjerringbro/Silkeborg og GOG mætast í hinni viðureign undanúrslitanna.
- Ýmislegt hefur verið rætt og ritað um argentínska knattspyrnusnillinginn Lionel Messi eftir að hann leiddi argentínska landsliðið til sigurs á heimsmeistaramótinu sem fram fór í Katar og lauk á dögunum. Eitt af því er viðtal við Messi í blaði í heimabæ hans þegar hann var 13 ára gamall. Þar svarar piltur ýmsum spurningum um lífið og tilveruna. Meðal þess sem kemur fram er að þá, fyrir nærri aldarfjórðungi, æfði Messi handknattleik með handknattleiksliðinu Newells og líkaði vel.
- Danska landsliðskonan Louise Burgaard hefur framlengt samning sinn við franska meistaraliðið Metz til ársins 2024. Burgaard gekk til liðs við Metz 2019 og líkar vel við lífið í borginni við Mósel í norðausturhluta Frakklands.
- Annar danskur handknattleiksmaður, Patrick Wiesmach, flytur heim í sumar og gengur til liðs við sitt gamla félag, Aalborg Håndbold. Wiesmach hefur síðustu fimm ár verið í herbúðum SC DHfk Leipzig. Hann á að fylla skarðið sem Andreas Flodman skilur eftir sig þegar hann fer til Göppingen í sumar.
- Jakob Vestergaard, sem þjálfar nú kvennalið Viborg, tekur í sumar við þjálfun þýska meistaraliðsins Bietigheim. Hann tekur við að Markus Gaugisch sem í haust var ráðinn þjálfari þýska kvennalandsliðsins. Gaugisch þjálfar bæði lið til vors en snýr sér þá alfarið að þjálfun landsliðsins.
- Auglýsing -
