- Auglýsing -
- Jens Bragi Bergþórsson hefur skrifað undir nýjan tveggja ára samning við handknattleiksdeild KA og er nú samningsbundinn úr leiktíðina 2025. Jens Bragi er aðeins 16 ára gamall en vakti verðskuldaða athygli fyrir mjög góða frammistöðu sem línumaður meistaraflokksliðs KA á síðari hluta keppnistímabilsins í Olísdeildinni. Hann skoraði 17 mörk, þar af sex í heimaleik á móti Selfossi.
- Tryggvi Þórisson og samherjar hans í Sävehof er komnir í undanúrslit í úrslitakeppni sænsku úrvalsdeildarinnar í handknattleik. Sävehof vann Guif í þriðja sinn í gærkvöld, 30:29, á heimavelli. Guif vann ekki leik í rimmunni. Tryggvi skoraði ekki mark í gær og virtist ekki hafa komið mikið við sögu.
- Færeyingurinn snjalli Elias Ellefsen á Skipagøtu skoraði tvö síðustu mörk leiksins fyrir Sävehof. Allar rimmur átta liða úrslita sænsku úrvalsdeildarinnar lauk með þremur vinningum gegn engum. Veikari liðin unnu ekki einn leik.
- GC Amicitia Zürich er komið undir á nýjan leik í rimmu sinni við BSV Bern í átta liða úrslitum svissnesku A-deildarinnar í handknattleik. GC Amicitia Zürich tapaði í gærkvöld öðru sinni á heimavelli fyrir höfuðborgarliðinu, 30:29. Ólafur Andrés Guðmundsson skoraði fjögur mörk, þar af eitt úr vítakasti, fyrir GC Amicitia Zürich sem verður að vinna fjórða leikinn í Bern á sunnudaginn til þess að herja út oddaleik á heimavelli.
- Danski handknattleiksþjálfarinn Jan Pytlick hefur sagt upp starfi sínu sem landsliðsþjálfari Sádi Arabíu í handknattleik karla. Pytlick, sem er 55 ára gamall og gerði garðinn frægan sem þjálfari danska kvennalandsliðsins, tók við þjálfun landsliðs Sádi Arabíu á síðasta sumri og stýrði því á HM í upphafi þessa árs. Lauk liðið keppni í 29. sæti. Pytlick var harðlega gagnrýndur í Danmörku í fyrrasumar fyrir að taka að sér starfið í konungsríkinu en lét það sem vind um eyru þjóta.
- Þýska handknattleiksliðið Rhein-Neckar Löwen hefur samið við danska handknattleiksmanninn örvhenta, Jon Lindenchrone Andersen. Anderson leikur með Göppingen. Honum stóð ekki til boða nýr samningur hjá Göppingen eftir að samið var við Svíann Erik Persson í nóvember.
- Auglýsing -
