- Auglýsing -
- Dönsku landsliðsmennirnir Lukas Jørgensen og Simon Pytlick ganga til liðs við þýska handknattleiksliðið Flensburg í sumar frá danska meistaraliðinu GOG. Báðir skrifuðu þeir undir nokkuð langa samninga. Pytlick verður samningsbundinn Flensburg til ársins 2027 en Jørgensen, sem er línumaður, til ársins 2026. Pytlick sló í gegn með landsliðinu á heimsmeistaramótinu í janúar þegar Danir urðu heimsmeistarar í þriðja sinn í röð.
- Norski landsliðsmaðurinn Kent Robin Tønnesen gengur til liðs við franska stórliðið PSG í sumar. Tønnesen er örvhent skytta sem nú er í herbúðum ungversku meistaranna Pick Szeged og hefur verið í tvö ár. Í fjögur ár þar á undan var kappinn með Veszprém og þar áður með Wetzlar og Füchse Berlin í Þýskalandi.
- Tomas Hlavaty tekur við starfi aðalþjálfara Evrópu- og Noregsmeistara Vipers Kristiansand í sumar af Ole Gustav Gjekstad sem flytur til Óðinsvéa í sumar og stýrir danska meistaraliðinu Odesene Håndbold næstu árin. Hlavaty er Slóvaki. Hann hefur undanfarið ár verið aðstoðarþjálfari Vipers. Áður var Hlavaty þjálfari hjá Rostov Don í Rússlandi en hrökklaðist þaðan eins og fleiri íþróttamenn og þjálfarar í kjölfar innrásar Rússa í Úkraínu fyrir rúmu ári.
- Danski handknattleiksþjálfarinn Kim Rasmussen sem sagt var upp starfi landsliðsþjálfara Suður Kóreu fyrir nokkrum vikum af því hann m.a. neitaði að liðið æfði þrisvar á dag, hefur verið ráðinn þjálfari CS Rapid Bucuresti. Rapid-liðið hefur gert það gott í Meistaradeild Evrópu í vetur en ekki tekist að skáka meisturum CSM Búkarest í deildinni heimafyrir. Því á Rasmussen að breyta.
- Talsvert er um meiðsli hjá danska stórliðinu Aalborg Håndbold um þessar mundir. Lukas Sandell, Jesper Nielsen og Buster Juul eru allir meiddir og verða frá keppni um tíma. Til viðbótar er Mikkel Hansen í veikindaleyfi.
- Auglýsing -
