- Auglýsing -
- Nicolej Krickau hættir þjálfun danska meistaraliðsins GOG eftir keppnistímabilið og tekur við þjálfun þýska liðsins Flensburg-Handewitt. TV2 í Danmörku fullyrti þetta í gær samkvæmt heimildum. TV2 segir ennfremur að þrátt fyrir Krickau hafi fyrir skömmu framlengt samning sinn við GOG til tveggja ára þá sé að finna útgönguákvæði í samningnum að ákveðnum skilyrðum uppfylltum.
- Guðjón Valur Sigurðsson, þjálfari Gummersbach, hefur krækt í 22 ára gamla örvhenta skyttu frá franska liðinu Montpellier, Giorgi Tskhovrebadze. Hann er landsliðsmaður Georgíu og verður væntanlega í eldlínunni með georgíska landsliðinu þegar það tekur þátt í EM í fyrsta sinn á næsta ári. Samningur Tskhovrebadze við Gummersbach er til fjögurra ára.
- Danski handknattleiksmaðurinn Mikkel Hansen er byrjaður hreyfa sig á nýjan leik eftir að hafa tekið sér frí frá handknattleik að loknu heimsmeistaramótinu í lok janúar vegna streitu og álags. Í tilkynningu sem félag Hansen, Aalborg Håndbold, sendi frá sér í gær kemur fram að Hansen sé á góðum batavegi. Ekki er von á honum aftur út á leikvöllinn á yfirstandandi keppnistímabili. Vonir standi til þess að Hansen geti byrjað að æfa á ný með Aalborg Håndbold þegar undirbúningur hefst síðar í sumar fyrir næstu leiktíð.
- Þýska landsliðið í handknattleik karla býr sig undir EM á heimavelli snemma á næsta ári með tveimur vináttuleikjum við Afríkumeistara Egyptalands 3. og 5. nóvember. Alfreð Gíslason er landsliðsþjálfari Þýskalands. Þjóðverjar mættu Egyptum á HM í janúar í leiknum um fimmta sæti mótsins. Þýska liðið hafði betur, 35:34, eftir framlengda viðureign.
- Danski handknattleiksþjálfarinn Martin Albertsen er sterklega orðaður við þjálfarastarfið hjá ungverska liðinu Ferencváros (FTC). Forráðamenn félagsins leita nú logandi ljósi að eftirmanni Elek Gabor sem hættir í sumar. Albertsen er um þessar mundir þjálfari kvennalandsliðs Sviss en hefur ekki verið við félagsþjálfun síðustu tvö ár eftir að hafa hætt að loknum fimm góðum árum hjá Bietigheim í Þýskalandi.
- Ef Albertsen verður ráðinn þjálfari FTC verður staðan sú að tvö bestu kvennalið Ungverjalands verða undir stjórn dansks þjálfara. Ulrik Kirkely, núverandi þjálfara Odense Håndbold, tekur við þjálfun Györ í sumar.
- Auglýsing -
