- Auglýsing -
- Haukar hafa kallað örvhenta hornamanninn Kristófer Mána Jónasson til baka úr láni hjá Aftureldingu þar sem hann hefur verið frá upphafi keppnistímabilsins. Kristófer Máni verður gjaldengur á ný með Haukum á föstudaginn, eftir því sem fram kemur í tilkynningu á Facebook-síðu Hauka í gærkvöld.
- Sjö leikmenn og starfsmenn þýska liðsins Füchse Berlín eru í einangrun vegna kórónuveirusmita. Leik liðsins við Rhein-Neckar Löwen um liðna helgi var frestað og sömu sögu er að segja um leikinn við Pfadi Winterthur sem fram átti að fara í Evrópudeildinni í gærkvöld.
- Norski línumaðurinn Petter Øverby gengur til liðs við THW Kiel næsta sumar. Hann kemur í stað Tékkans Pavel Horak sem rær á ný en óþekkt mið. Horak, sem er 39 ára gamall, segist ekki vera tilbúinn að leggja keppnisskóna á hilluna enn sem komið er en með öllu óvíst er úr hvorri Keflavíkinni hann rær. Øverby kemur til Kiel frá Erlangen.
- Svíinn Jonas Larholm er hvergi af baki dottinn þótt hann sé orðinn 39 ára gamall. Hann framlengdi í gær samning sinn við Ribe Esbjerg til þriggja ára.
- Þrátt fyrir að vera með sjö leikmenn í einangrun og sóttkví þá neitar austurríska landsliðið í handknattleik að leggja árar í bát á heimsmeistaramótinu í handknattleik kvenna á Spáni. Þeir sem eftir standa mæta ótrauðir til til leiks gegn Brasilíu í kvöld í fyrsta umferð milliriðlakeppni mótsins. Sjöundi leikmaðurinn greindist smitaður í gær.
- Auglýsing -
