- Auglýsing -
- Endijs Kusners og Rolands Lebedevs leikmenn Harðar á Ísafirði eru í landsliðshópi Lettlands sem leikur í Baltic cup mótinu, fjögurra liða móti, sem fram fer í Riga í Lettlandi á laugardag og sunnudag. Landslið Eistlands, Litáen og Finnlands taka einnig þátt í mótinu. Þorsteinn Gauti Hjálmarsson leikmaður Fram var valinn í finnska landsliðshópinn fyrir mótið.
- Þorsteinn Gauti kemur til móts við nýja samherja sína í finnska landsliðinu í Helsinki í dag og fer með þeim til Riga á morgun. Finnar mæta Litáum á laugardaginn. Í síðari leiknum á sunnudaginn leikur finnska landsliðið við Letta eða Eistlendinga.
- Axel Stefánsson sá lið sitt Storhamar vinna öruggan sigur á Romerike Ravens, 34:29, í norsku úrvalsdeildinni í handknattleik kvenna í gærkvöld. Leikið var í Hamri. Axel er annar tveggja þjálfara Storhamar sem er í öðru sæti deildarinnar með 14 stig eftir 10 leiki, sex stigum á eftir Vipers sem vann Fana með 16 marka mun í gærkvöld.
- Elín Jóna Þorsteinsdóttir landsliðsmarkvörður varði 11 skot, 29%, fyrir Ringkøbing Håndbold í gærkvöld þegar liðið tapaði með 10 marka mun, 30:20, fyrir Herning-Ikast á miðju Jótlandi. Ringkøbing Håndbold situr í níunda sæti dönsku úrvalsdeildarinnar með sjö stig eftir 12 leiki. Herning-Ikast er efst. Elín Jóna stóð allan leikinn í markinu.
- Steinunn Hansdóttir skoraði tvö mörk fyrir Skanderborg Håndbold í sex marka tapi fyrir Aarhus Håndbold, 30:24, í Árósum í gærkvöld. Liðin eiga bæði sæti í dönsku úrvalsdeildinni. Skanderborg er næst neðst. Aðeins gjaldþrotalið Randers er neðar en öll úrslit liðsins voru strikuð út í haust þegar rekstur þess fór í þrot.
- Ungverska landsliðið varð fyrir áfalli í gær þegar Adam Juhasz fékk þungt högg á augað á æfingu. Juhasz, sem er miðjumaður Evrópumeistara Benfica, verður af þessum sökum ekki með ungverska landsliðinu á HM sem hefst eftir viku. Íslenska landsliðið mætir ungverska landsliðinu laugardaginn 14. janúar.
- Kent Robin Tønnesen hefur verið kallaður inn í norska landsliðið í stað Harald Reinkind sem er meiddur. Meiðslin eru ekki talin svo alvarleg að Reinkind geti ekki tekið þátt í HM. Tønnesen tekur að minnsta kosti slaginn með norska landsliðinu á fjögurra liða æfingamóti sem hefst í Þrándheimi í dag. Norðmenn mæta Portúgölum í fyrstu umferð.
- Dejan Manaskov er sagður fara til Barcelona eftir heimsmeistaramótið í lok janúar og hlaupa í skarðið fyrir Aitor Ariño sem er meiddur og verður frá keppni í töluverðan tíma. Manaskov er samningsbundinn Vardar.
- Auglýsing -
