- Auglýsing -
- Norska handknattleikskonan, Heidi Løke, hefur síður en svo lagt árar í bát þótt hún hafi óskað eftir að losna undan samningi hjá Vipers Kristiansand í vor. Løke hefur samið við Larvik. Hún lék með liði félagsins 2000 til 2002 og aftur frá 2007 til 2011. Á þeim árum var Larvik stórveldi í norskum handknattleik. Løke er ein þekktasta og fremsta handknattleikskona Noregs frá upphafi. Hún verður 40 ára í desember og rifaði fyrir nokkru síðan seglin með landsliðinu og ákvað að helga fjölskyldu sinni meiri tíma. Løke eignaðist sitt þriðja barn í apríl á þessu ári.
- Einar Þorsteinn Ólafsson fagnaði sigri í fyrsta leik sínum fyrir Fredericia HK þegar liðið lagði IFK Kristianstad, 33:29, í æfingaleik í gær. Guðmundur Þórður Guðmundsson tók við þjálfun Fredericia HK í sumar.
- Jan Bašný sem þjálfað hefur kvennalandslið Tékka um langt árabil hefur verið leystur frá störfum. Forráðamenn tékkneska handknattleikssambandsins telja að tími sé kominn að skipta um mann í brúnni en Bašný hefur unnið fyrir sambandið í 12 ár. Tékkneska landsliðinu tókst ekki að tryggja sér keppnisrétt á EM sem fram fer í nóvember. Sú staðreynd varð til þess m.a. að ákveðið var að stokka upp spilin.
- Galina Gabisova hefur framlengt samning sinn við rússneska meistaraliðið Rostov-Don. Félagið er afar ánægt með að halda öfluga markverðinum þar sem nokkur flótti hefur verið frá rússneskum liðum síðustu mánuði eftir innrás Rússa í Úkraínu.
- Auglýsing -
