- Auglýsing -
- Norska handknattleiksliðið Nærbø frá samnefndum liðlega sjö þúsund manna bæ í Rogalandi varð á laugardaginn sigurvegari í Evrópubikarkeppninni í handknattleik karla, áður Áskorendakeppni Evrópu. Nærbø vann rúmenska liðið Baia Mare, 27:26, í síðari viðureign liðanna í úrslitum. Leikið var í Rúmeníu. Nærbø vann einnig fyrri viðureignina, 29:25. Lið Nærbø hefur skotist fram á sjónarsviðið á fáeinum árum en flestir leikmenn eru uppaldir hjá félaginu. Ýtarlega var fjallað um liðið í grein á handbolta.is á síðasta ári en hlekkur á hana er neðst í þessari grein.
- Amandine Leynaud, markvörður franska landsliðsins í handknattleik kvenna, hefur ákveðið að leggja keppnisskóna á hilluna eftir langan og farsælan feril. Hún hefur m.a. verið markvörður landsliðsins í 16 ár og var í sigurliðinu á Ólympíuleikunum á síðasta ári. Síðustu fjögur ár hefur Leynaud staðið í marki ungverska stórliðsins Györ. Hin danska Sandra Toft kemur í hennar stað hjá Györ eins og handbolti.is sagði frá síðla vetrar. Leynaud ætlar ekki að segja alveg skilið við handknattleikinn því hún hefur verið ráðinn markvarðaþjálfari hjá Bourg-de-Péage Drôme Handball í heimalandinu.
- Bietigheim varð í gær þýskur bikarmeistari í handknattleik kvenna með 10 marka sigri á Oldenburg, 40:30, í úrslitaleik í Porsche Arena í Stuttgart þar sem úrslitahelgi bikarkeppninnar fór fram í gær og í fyrradag. Þetta er þriðji titill Bietigheim á tímabilinu. Nokkuð er síðan liðið tryggði sér þýska meistaratitilinn og fyrir hálfum mánuði vann Bietigheim Evrópudeildina.
- Hypo Niederösterreich varð um helgina austurrískur meistari í handknattleik í 44. sinn og er liðið það langsamlega sigursælasta í kvennahandknattleik í landinu. Hypo Niederösterreich varð einnig deildarmeistari í vor og vann bikarkeppnina nokkru síðar. Hildigunnur Einarsdóttir landsliðskona og nú leikmaður Vals lék með Hypo-liðinu leiktíðina 2017/2018.
- Auglýsing -
