- Auglýsing -

Molakaffi: Meistaradeildin, Aron, Nielsen, Guðjón Valur

Leikmenn Györ voru glaðir í bragði eftir að þeir tryggðu sér sæti í undanúrslitum Meistaradeildar Evrópu á laugardaginn. Mynd/EPA
  • Ríkjandi Evrópumeistarar Györ frá Ungverjalandi mæta Brest frá Frakklandi í undanúrslitum Meistaradeildar kvenna 29. maí í Búdapest þegar úrslitahelgi keppninnar fer fram. Í hinni viðureign undanúrslita eigast við Vipers frá Noregi og CSKA frá Rússlandi. Sigurliðin mætast í úrslitaleik 30. maí en tapliðin kljást um bronsverðlaunin. Dregið var til undanúrslita í gær. 
  • Aron Pálmarsson skoraði þrjú mörk í fjórum tilraunum þegar Barcelona vann Bidasoa, 35:27, í uppgjöri tveggja efstu liða spænsku 1.deildarinnar í handknattleik í Barcelona í gær. Aron og félagar voru fimm mörkum yfir að loknum fyrri hálfleik, 18:13. Barcelona er efst í deildinni sem fyrr með 52 stig eftir 26 leiki. Bidasoa er í öðru sæti með 41 stig en hefur leikið einum leik fleira en Barca. 
  • Sænski línumaðurinn Jesper Nielsen leikur ekki með Rhein-Neckar Löwen næstu vikur eftir að hafa meiðst í viðureign gegn Coburg um síðustu helgi. Meiðsli Nielsen bætast ofan á fjarveru fyrirliðans Uwe Gensheimer sem í síðustu viku fór í speglun á hné og verður frá keppni í a.m.k. sex vikur. 
  • Guðjón Valur Sigurðsson og liðsmenn hans í Gummersbach töpuðu í gærkvöld fyrir Ferndorf á útivelli, 27:25, í þýsku 2. deildinni í handknattleik. Þar með missti Gummersbach-liðið af tækifærinu á að endurheimta annað sæti deildarinnar og situr sem fyrr í þriðja sæti, einu stigi á eftir N-Lübbecke og tveimur frá Hamburg sem situr á toppnum og á auk þess leik til góða á liðin tvö sem næst eru. Elliði Snær Viðarsson var ekki með Gummersbach. Hann er frá keppni vegna meiðsla.
- Auglýsing -
- Auglýsing -

Nýjustu fréttir

- Auglýsing -