- Auglýsing -
- Balingen-Weilstetten, liðið sem Daníel Þór Ingason og Oddur Gretarsson leika með, er eina taplausa lið þýsku 2. deildarinnar þegar fimm umferðum er lokið. Balingen vann nauman sigur á HC Motor í gær á heimavelli, 33:32.
- Oddur skoraði þrjú mörk í leiknum, eitt þeirra úr vítakasti. Daníel Þór var ekki í leikmannahópi Balingen eftir að hafa átt stórleik í sigri í fjórðu umferð fyrir liðlega viku. Roland Eradze er aðstoðarþjálfari HC Motor og Íslandsvinurinn Gintaras Savukynas er aðalþjálfari. HC Motor er með tvö stig.
- Orri Freyr Þorkelsson var ekki í leikmannahópi Elverum í gær þegar liðið vann Drammen með sex marka mun, 32:26, á heimavelli í norsku úrvalsdeildinni í handknattleik. Óskar Ólafsson skoraði fimm mörk fyrir Drammenliðið og var í stóru hlutverki að vanda. Viktor Petersen Norberg skoraði þrjú mörk. Liðin eru jöfn að stigum í þriðja til fjórða sæti með sex stig hvort eftir fjórar umferðir.
- Ómar Ingi Magnússon er ásamt Dominik Mappes, Gummersbach, markahæstur í þýsku 1. deildinni í handknattleik að loknum sex umferðum með 48 mörk. Ómar hefur skorað 27 mörk úr vítaköstum og er með 76% skotnýtingu. Einnig eru skráðar 27 stoðsendingar á Selfyssinginn.
- Lucas Krzikalla, samherji Viggós Kristjánssonar hjá þýska handknattleiksliðinu Leipzig, sagði frá því í samtali við Welt am Sonntag um nýliðna helgi að hann væri samkynhneigður. Krzikalla, sem er 28 ára, mun vera fyrsti íþróttamaðurinn í liðsíþrótt í Þýskalandi sem kemur út úr skápnum á meðan ferillinn á íþróttavellinum stendur yfir.
- Auglýsing -
