- Auglýsing -
- Oddur Gretarsson er í liði 22. umferðar í þýsku 2. deildinni í handknattleik eftir stórleik í fyrrakvöld með Balingen-Weilstetten gegn Hüttenberg, 35:20. Oddur skoraði 11 mörk í 13 skotum. Hann er fimmti markahæsti leikmaður deildarinnar með 131 mark, hann er 13 mörkum á eftir Ihor Turchenko leikmanni HC Motor sem skorað hefur flest mörk í deildinni.
- Ólafur Andrés Guðmundsson er enn fjarverandi vegna meiðsla sem hann varð fyrir á æfingu íslenska landsliðsins í Gautaborg í síðasta mánuði. Hann var þar af leiðandi ekki með GC Amicitia Zürich í gærkvöld þegar liðið tapaði fyrir BSV Bern, 33:30, í Gümligen Mobiliar Arena í Bern í svissnesku A-deildinni í handknattleik karla. GC Amicitia Zürich er í fimmta sæti af 10 liðum deildarinnar.
- Handknattleiksmaðurinn Petar Nenadic, liðsfélagi Bjarka Más Elíssonar hjá Veszprém, hefur verið settur úr liðinu um ótiltekinn tíma. Kergja virðist hlaupin í samskipti Nenadic og stjórnenda félagsins. Ekki er ljóst af hverju sú kergja starfar en Nenadic hefur fyrir nokkru ákveðið að yfirgefa Veszprém í sumar og ganga til liðs við Dinamo Búkarest.
- Uppi er hugmyndir um að rífa Scandinavium íþróttahöllina í Gautaborg og byggja aðra stærri íþrótta- og sýningahöll á grunni þeirra sem nú er. Sænskir fjölmiðlar segja frá þessu og fullyrða að ákvörðun verði tekin á fundi borgarstjórnar Gautaborgar í næsta mánuði. Ný og stærri keppnishöll á að vera komin í gagnið fyrir EM 2028. Íslenska landsliðið í handknattleik karla lék í milliriðlum HM í síðasta mánuði í Scandinavium.
- Auglýsing -
