- Auglýsing -
- Óðinn Þór Ríkharðsson skoraði níu mörk, þar af eitt úr vítakasti, þegar Kadetten Schaffhausen vann BSV Bern, 37:32, á útivelli í svissnesku 1. deildinni í gær. Kadetten, sem er undir stjórn Aðalsteins Eyjólfssonar, er sem fyrr í efsta sæti deildarinnar.
- Oddur Gretarsson skoraði 11 mörk og var markahæstur hjá Balingen í fimm marka sigri á Nordhorn á heimavelli í gær í þýsku 2. deildinni í handknattleik, 29:24. Sex marka sinna skoraði Oddur af vítapunktinum. Daníel Þór Ingason skoraði eitt mark en brást bogalistin í sjö skotum. Hann gaf eina stoðsendingu og var einu sinni vísað af leikvelli.
- Balingen er efst í 2. deild með 20 stig eftir 10 leiki og hefur þriggja stiga forskot á Eisenach sem er í öðru sæti. Eisenach vann Empor Rostock, 31:23, á heimavelli. Sveinn Andri Sveinsson skoraði þrjú mörk fyrir Rostock og Hafþór Már Vignisson eitt auk einnar stoðsendingar. Empor Rostock hefur tvö stig eftir 10 leiki og rekur lestina í deildinni ásamt Wolfe Würzburg.
- Aalborg Håndbold situr áfram í efsta sæti dönsku úrvalsdeildarinnar eftir leiki gærdagsins með 19 stig að loknum 10 leikjum. Aron Pálmarsson skoraði þrjú mörk og átti tvær stoðsendingar í öruggum sigri liðsins á Mors-Thy, 31:26, á útivelli. Mikkel Hansen og Lukas Sandell skoruðu fimm mörk hvor fyrir Álaborgarliðið og voru markahæstir.
- Elvar Ásgeirsson skoraði þrjú mörk og gaf sex stoðsendingar í sigri Ribe-Esbjerg á SønderjyskE á útivelli, 36:31, í dönsku úrvalsdeildinni í gær. Ágúst Elí Björgvinsson stóð annan hálfleikinn í marki Ribe-Esbjerg og varði fjögur skot, 20%. Arnar Birkir Hálfdánsson skoraði ekki mark gegn sínu gamla liði. Ribe-Esbjerg er í sjötta sæti með 12 stig eftir tíu leiki, er sjö stigum á eftir Aalborg Håndbold.
- Bjartur Már Guðmundsson var í leikmannahópi Roskilde þegar liðið steinlá fyrir Rækker Mølle Håndbold, 28:14, á heimavelli í gær. Bjartur Már skoraði ekki mark og virtist lítið hafa komið við sögu eins og Rógvi Dal Christiansen fyrrverandi línumaður Fram. Hróarskelduliðið er í 11. sæti af 13 í næst efstu deild að loknum níu leikjum.
- Auglýsing -
