- Auglýsing -
- Óðinn Þór Ríkharðsson skoraði sjö mörk og var markahæstur hjá Kadetten Schaffhausen í gær þegar liðið vann HSC Suhr Aarau öðru sinni í átta liða úrslitum svissnesku úrvalsdeildarinnar í handknattleik í gær, 35:24. Leikurinn fór fram í Aarau. Næsti leikur liðanna verður í Schaffhausen á laugardaginn eftir viku. Kadetten, sem Aðalsteinn Eyjólfsson þjálfar, vantar einn vinning til viðbótar til þess að tryggja sér sæti í átta liða úrslitum.
- Oddur Gretarsson skoraði sex mörk, þar af fimm úr vítaköstum og Daníel Þór Ingason tvö þegar lið þeirra, Balingen-Weilstetten, vann Nordhorn í æsispennandi leik á heimavelli Nordhorn, 31:30, í gær í þýsku 2. deildinni í handknattleik. Sigurmark leiksins var skorað á síðustu sekúndum. Balingen-Weilstetten er með sex stiga forskot í efsta sæti, 49, eftir 29 leiki.
- Sveinn Andri Sveinsson var ekki á meðal markaskorara HC Empor Rostock þegar liðið tapaði fyrir Eisenach, 24:21, í 2. deild þýska handknattleiksins á heimavelli í gær. Hvorki hefur gengið né rekið hjá HC Empor Rostock á leiktíðinni. Liðið er næst neðst með 12 stig eftir 28 leiki.
- Tryggvi Þórisson og samherjar hans í Sävehof standa vel að vígi eftir að hafa unnið Guif tvisvar í átta liða úrslitum um sænska meistaratitilinn í handknattleik karla. Þeir unnu annan leikinn í gær er þeir sóttu Guif heim til Eskilstuna, 40:28. Þriðja viðureign liðanna verður í Partille á fimmtudaginn. Takist Sävehof að vinna tryggir liðið sér sæti í undanúrslitum. Tryggvi kom lítið við sögu í leiknum í gær.
- Heims- og Evrópumeistarar Noregs í handknattleik kvenna unnu landslið Svartfjallalands öðru sinni í vináttulandsleik í Volda í gær, 27:23. Nora Mørk var markahæst í norska liðinu með fimm mörk og Itana Grbic skoraði sex mörk fyrir svartfellska landsliðið.
- Auglýsing -
