- Auglýsing -
- Ólafur Andrés Guðmundsson og samherjar í Montpellier færðust upp í annað sæti A-riðils Meistaradeildar Evrópu í handknattleik er þeir unnu Meshkov Brest örugglega á heimavelli, 32:26, í gærkvöld. Montpellier hefur sjö stig eftir fimm leiki og er aðeins stigi á eftir Aalborg sem trónir á toppnum.
- Díana Dögg Magnúsdóttir skoraði eitt mark, skapaði þrjú færi og átti þrjár stoðsendingar, þegar lið hennar BSV Sachsen Zwickau tapaði fyrir Metzingen í þýsku 1. deildinni í gærkvöld, 22:17. Hún átti afar góðan leik í vörninni. BSV Sachsen Zwickau var marki yfir í hálfleik, 10:9, en mátti gefa eftir í síðari hálfleik gegn hinu sterka liði Metzingen sem er í þriðja sæti deildarinnar. BSV Sachsen Zwickau er í hópi neðstu liða með tvö stig að loknum sex umferðum.
- Elín Jóna Þorsteinsdóttir varði átta skot, 25% markvarsla, þegar lið hennar Ringköbing tapaði fyrir hinu afar öfluga liði Team Esbjerg, 32:24, í dönsku úrvalsdeildinni í gær. Leikið var í Esbjerg. Ringköbing er í 13. og næst neðsta sæti með fjögur stig eftir átta leiki.
- Axel Stefánsson og lið hans Storhamar, trónir áfram á toppi norsku úrvalsdeildarinnar í kvennaflokki. Storhamar vann áttunda leikinn í röð í gær er það lagði Molde í hörkuleik á heimavelli, 40:34.
- Birta Rún Grétarsdóttir var ekki í leikmannahópi Oppsal er liðið vann baráttusigur á Tertnes, 28:27, á útivelli í norsku úrvalsdeildinni í handknattleik í gær. Þetta er annar leikurinn í röð sem Birta Rún er ekki í hópnum hjá Óslóarliðinu. Oppsal lyftist upp í áttunda sæti deildarinnar með þessum sigri, er með sex stig eftir átta leiki.
- Óskar Ólafsson skoraði þrjú mörk og Viktor Petersen Norberg tvö er lið þeirra Drammen vann Sandefjord, 30:23, í norsku úrvalsdeildinni í karlaflokki á heimavelli í gær. Drammen er í þriðja sæti með 12 stig eftir átta leiki. Elverum er efst sem fyrr með 14 stig eftir sjö leiki.
- Bjarni Ófeigur Valdimarsson skoraði fimm sinnum fyrir IFK Skövde þegar liðið tapaði fyrir Amo HK, 36:32, í fyrri viðureign liðanna í átta lið úrslitum sænsku bikarkeppninnar í gær. Síðari leikirinn verður 17. nóvember í Skövde.
- Auglýsing -
