- Auglýsing -
- Danski handknattleiksmaðurinn Morten Olsen tilkynnti í gær að hann gefi ekki kost á sér framar í danska landsliðið. Olsen sem er 36 ára gamall var í silfurliði Dana á Ólympíuleikunum sem lauk fyrir viku. Hann lék sinn fyrsta landsleik fyrir 15 árum en fékk ekki almennilegt tækifæri fyrr en Guðmundur Þórður Guðmundsson tók við þjálfun danska landsliðsins 2014.
- Olsen lék mjög stórt hlutverki í sigurliði Dana undir stjórn Guðmundar Þórðar á leikunum í Ríó fyrir fimm árum. Alls lék Olsen 118 landsleiki og varð tvisvar heimsmeistari auk þess að vinna gull og silfur á Ólympíuleikum. Olsen leikur með GOG í Danmörku og er samherji Viktors Gísla Hallgrímssonar landsliðsmarkvarðar.
- Slóvenski línumaðurinn Kristjan Horzen gengur nú þegar til liðs við Rhein-Neckar Löwen í Þýskalandi en ekki eftir ár eins og til stóð þegar hann skrifaði undir samning við félagið í sumar. Löwen hefur náð samkomulagi við RK Celje um að kaupa Horzen, sem er 21 árs gamall og talinn mikið efni, undan samningi við Celje-liðið.
- Sænski handknattleiksmaðurinn Loui Sand hefur samið við Kärra í úrvalsdeild karla. Það væri e.t.v ekki í frásögur færandi nema að allt þar til fyrir tveimur árum lék Sand með liðum í kvennaflokki s.s. Sävehof, Brest Bretagne og Fleury Loiret Handball og á m.a. 105 landsleiki að baki með sænska kvennalandsliðinu og bronsverðlaun frá EM kvenna 2014 auk þess að vera í Ólympíuliði Svía fyrir fimm árum. Árið 2018 ákvað Sand að hætta í handbolta og gangast undir kynleiðréttingu. Nú er það ferli á enda og Louise Sand orðinn Loui Sand og kominn á fulla ferð á ný á handknattleiksvellinum.
- Auglýsing -
