- Auglýsing -
- Sænska handknattleikskonan Emma Olsson sem varð Íslandsmeistari með Fram á síðasta vori hefur framlengt samning sinn við þýska liðið Dortmund til eins árs. Olsson skrifaði undir eins árs samning við Dortmund fyrir ári með möguleika á eins árs framlengingu sem nú hefur verið raunin. Olsson sagði í samtali við handbollskanalen í Svíþjóð að árið á Íslandi hafi verið afar lærdómsríkt. M.a. lýkur hún lofsorði á Stefán Arnarson þjálfara Fram sem hún segir vera einn allra snjallasta þjálfara sem hún hafi unnið með.
- Ásgeir Snær Vignisson var ekki með Helsingborg í gærkvöld þegar liðið mætti Svíþjóðarmeisturum Ystad á heimavelli og tapaði með minnsta mun, 27:26. Helsingborg er í 12. sæti af 14 liðum sænsku úrvalsdeildarinnar með 13 stig eftir 19 leiki. Ystad er í þriðja sæti með 23 stig, níu stigum á eftir Kristianstad sem er efst.
- Uppselt er á toppslag dönsku úrvalsdeildarinnar í handknattleik karla á laugardaginn þegar meistarar GOG sækja Aalborg Håndbold heim. Tólf landsliðsmenn taka þátt í leiknum, þar af fimm úr danska landsliðinu sem varð heimsmeistari á sunnudagskvöld.
- Hollenska línukonan Yvette Broch hefur framlengt samning sinn við ungverska stórliðið Györi ETO KC til ársins 2024. Broch segir í samtali við heimasíðu Györ að hún hlakki til að vinna með Ulrik Kirkely þjálfara sem kemur til starfa í sumar.
- Auglýsing -
