- Auglýsing -
- Norski landsliðsmaðurinn Tobias Grøndahl tryggði Noregsmeisturum Elverum baráttusigur á ØIF Arendal á útivelli í gærkvöld, 32:31, í norsku úrvalsdeildinni í handknattleik. Grøndahl skoraði sigurmarkið úr vítakasti þegar leiktíminn var úti. Orri Freyr Þorkelsson skoraði eitt mark fyrir Elverum sem var fimm mörkum undir eftir fyrri hálfleik, 17:12. Fyrir utan lokastöðuna þá var Elverum síðast yfir í leiknum í stöðunni, 4:3.
- Lengi vel í síðari hálfleik benti ekki margt til þess að Elverum færi með annað stigið, hvað þá bæði, heim úr Sør Amfi íþróttahöllinni í Arendal. Þegar níu mínútur voru til leiksloka var Elverum fimm mörkum undir, 29:24. Með sigrinum komst Elverum upp í annað sæti deildarinnar, alltént í bili.
- Rúnar Kárason og Sunna Jónsdóttir voru valin handknattleiksfólk ársins 2022 hjá ÍBV á uppskeruhátíð Íþróttabandalags Vestmannaeyja sem fram fór í fyrrakvöld. Elmar Erlingsson var valinn íþróttamaður æskunnar hjá ÍBV ásamt knattspyrnukonunni Birnu Maríu Unnarsdóttur. Hinn þrautreyndi og ráðagóði liðsstjóri karlaliðs ÍBV í handknattleik til margra ára, Halldór Sævar Grímsson, var heiðraður með silfurmerki á uppskeruhátíðinni.
- Kim Rasmussen er hættur í starfi landsliðsþjálfara Suður Kóreu í kvennaflokki eftir aðeins átta mánuði í starfi. Þrátt fyrir gott gengi liðsins undir hans stjórn, en það varð m.a. Asíumeistari í haust, þá var Dananum gert að axla sín skinn.
- Rasmussen segir í samtali við TV2 í Danmörku að ágreiningur um þjálfun hafi m.a. valdið því að honum var gert að láta staðar numið. M.a. tók hann ekki í mál að láta leikmenn æfa þrisvar á dag. Rasmussen vildi gæði umfram magn. Stjórnendur handknattleikssambands Suður Kóreu voru á öðru máli.
- Rasmussen er þrautreyndur þjálfari landsliða og félagsliða í kvennaflokki. Pólska landsliðið náði afar góðum árangri undir hans stjórn fyrir nokkrum árum. Um tíma var Daninn einnig þjálfari landsliðs Svartfjallalands.
- Barcelona hefur samið við landsliðsmanninn og leikstjórnandann Pol Valera. Hann kemur til félagsins frá Granolles og hefur skrifað undir samning við Barcelona fram til ársins 2026. Í sárabætur hefur Barcelona lánað ungstirnið Bruno Reguard til Granolles næsta hálfa annað árið. Valera var kallaður í skyndi inn í spænska landsliðið á miðju heimsmeistaramótinu en hann var þá í fríi í London með eiginkonu sinni.
- Sænski handknattleiksmaðurinn og hægri hornamaður Sebastian Karlsson kveður IF Sävehof og gengur til liðs við Montpellier í Frakklandi á næsta sumri. Egyptinn Ahmed Hesham verður einnig liðsmaður Montpellier frá og með næsta tímabili. Hann er núna í herbúðum Nimes.
- Auglýsing -
