- Auglýsing -
- Auglýsing -
- Auglýsing -

Molakaffi: Pajovic, Dissinger, bikar í Svíþjóð, Borozan

Ales Pajovic landsliðsþjálfari Austurríkis fylgist með sínum mönnum í leik á Ásvöllum fyrir nærri ári. Mynd/Hafliði Breiðfjörð
- Auglýsing -
  • Slóveninn Ales Pajovic hefur skrifað undir nýjan samning um þjálfun austurríska karlalandsliðsins. Nýi samningurinn gildir til ársins 2025. Pajovic tók við þjálfun landsliðsins af Patreki Jóhannessyni eftir HM árið 2019. Mikil ánægja ríkir með störf Slóvenans. Austurríska landsliðið var eitt fjögurra landsliða sem tryggði sér um síðustu helgi farseðilinn á EM á næsta ári. 
  • Þýski handknattleiksmaðurinn Christian Dissinger hefur verið leystur undan samningi hjá Dinamo Búkarest. Umsvifalaust hefur Dissinger samið við Al Duhail SC í Doha í Katar. Samningurinn við Al Duhail SC er til loka leiktíðarinnar. Dissinger hefur víða verið á ferlinum, auk Dinamo má nefna Vardar Skopje og THW Kiel auk þess að leika á fimmta tug landsleikja fyrir Þýskaland. M.a. var Dissinger í sigurliði Þjóðverja á EM 2016 undir stjórn Dags Sigurðssonar. 
  • IFK Kristianstad varð sænskur bikarmeistari í handknattleik karla. Kristianstad lagði Hammarby í háspennuleik í úrslitum, 35:32. Úrslit voru knúin fram í vítakeppni. 
  • Svartfellingurinn Vuko Borozan er kominn til liðs við PPD Zagreb í annað sinn á keppnistímabilinu og á nú að verða maðurinn sem ríður baggamuninn fyrir liðið í keppninni RK Nexe og meistaratitilinn í Króatíu. Það væri svo sem ekki í frásögur færandi nema fyrir þær sakir að Borozan var sagt upp samningi við Zagreb-liðið í september, aðeins þremur mánuðum eftir að hann samdi við liðið.
  • Borozan var fyrirvaralaust sagt upp samningi í september á þeim forsendum að hann gæti ekki staðist þær kröfur sem gerðar væru til hans. Mátti svo skilja að kappinn væri ekki í líkamlegu standi. Nú er komið annað hljóð í strokkinn hjá stjórnendum PPD Zagreb sem telja Svartfellinginn vera kjölfestu liðsins.  Ef Borozan var ekki í standi til þess að leika handknattleik í september er óvíst að hann sé það núna enda ekkert leikið síðan í maí í fyrra. 
- Auglýsing -
- Auglýsing -
- Auglýsing -
- Auglýsing -
- Auglýsing -
- Auglýsing -