- Auglýsing -
- Franski landsliðsmarkvörðurinn Wesley Pardin meiddist illa á hægra hné eftir 20 mínútna leik gegn Sviss í gær eftir að Cedrie Tunowski skall á fótlegg hans. Tveir samherjar Pardin urðu að bera hann af leikvelli og ljóst er að hnéið er illa farið og hann leikur ekki meira með franska landsliðinu á mótinu. Það er mikið áfall fyrir franska liðið og Pardin sjálfan sem fór á kostum í tveimur fyrstu leikjum Frakka á mótinu og hafði varið vel þegar óhappið varð í gær.
- Pardin hefur leikið frábærlega í frönsku 1.deildinni á leiktíðinni og hefur af mörgum þótt besti markvörður deildarinnar ásamt Emil Nielsen hjá Nantes. Pardin er samherji landsliðsmannsins Kristjáns Arnar Kristjánssonar, Donna, hjá PAUC-Aix sem sló í gegn á þeim fáum mínútum sem hann fékk til að spreyta sig með íslenska landsliðinu gegn Marokkó.
- Danski landsliðsmaðurinn Emil Jakobsen má blanda geði með samherjum sínum í landsliðinu á nýjan leik eftir að hafa fengið í tvígang neikvæðar niðurstöðu við skimun eftir kórónuveirunni í Kaíró. Jakobsen var greindur jákvæður við skimun til Egyptalands og var settur í sóttkví. Eins og hann og fleiri sögðu strax í upphafi var hann með mótefni enda veiktist hann af veirunni í lok nóvember þegar upp kom hópsýking hjá félagsliði hans GOG.
- Diego Simonet, besti handknattleiksmaður Argentínu, tekur ekki þátt í leiknum við Dani í lokaumferð D-riðils á heimsmeistaramótinu í handknattleik í dag. Simonet meiddist gegn Barein í fyrradag. Ekki er ljóst hvort hann er alveg úr leik á mótinu. Simonet leikur með Montpellier í Frakklandi og var m.a. valinn besti leikmaður úrslitahelgar Meistaradeildar Evrópu vorið 2018.
- Sumir leikmenn landsliðs Grænhöfðaeyja sáu það fyrst á netmiðlum að búið væri að draga landslið þeirra úr keppni á heimsmeistaramótinu í handknattleik í gær. Voru það þeim talsverð vonbrigði að vera ekki betur upplýstir um stöðu mála.
- Auglýsing -
