- Auglýsing -

Molakaffi: Sandra, Sveinn, Aldís, Ásdís, Tryggvi, Viktor, Egill, Jakob, Kristinn, Axel

Sandra Erlingsdóttir landsliðskona í handknattleik og leikmaður Metzingen. Mynd/Hafliði Breiðfjörð
  • Sandra Erlingsdóttir skoraði þrjú mörk og átti tvær stoðsendingar þegar lið hennar Metzingen tapaði fyrir Dortmund, 31:29, í þýsku 1. deildinni í handknattleik. Leikið var í Dortmund og tókst heimaliðinu að kreista fram sigur í lokin. Metzingen situr í 10. sæti af 14 liðum með fjögur stig eftir sex leiki. Dortmund er í þriðja sæti með 10 stig eftir sex leiki.
  • Emma Olsson sem lék með Fram á síðustu leiktíð og varð Íslandsmeistari með liðinu í vor skoraði þrjú mörk fyrir Dortmund í leiknum við Metzingen og var tvisvar sinnum vísað af leikvelli.
  • Sveinn Jóhannsson skoraði eitt mark og var einu sinni vísað af leikvelli þegar lið hans, Skjern, tapaði óvænt fyrir SønderjyskE, 28:26, í dönsku úrvalsdeildinni í gær en leikurinn fór fram Broager Sparekasse, heimavelli SønderjyskE. Skjern situr í fimmta sæti deildarinnar en SønderjyskE er í 10. sæti af 14 liðum. 
  • Skara HF, liðið sem Aldís Ásta Heimisdóttir, Ásdís Guðmundsdóttir og Jóhanna Margrét Sigurðardóttir leika með, tapaði fyrir H65 Höör, 35:25, í fyrri viðureign liðanna í 8-liða úrslitum sænsku bikarkeppninnar í gær.
  • Síðari leikurinn verður í Skara 17. desember. Jóhanna Margrét Sigurðardóttir var ekki gjaldgeng með Skara í gær vegna þess að hún lék í haust með Önnereds á fyrri stigum bikarkeppninnar.
  • Aðeins 11 leikmenn voru á skýrslu hjá Skaraliðinu í leiknum. Síðustu 20 mínútur leiksins reyndust Skara erfiðar en sá kafli tapaðist 16:7. Aldís Ásta skoraði fimm mörk og Ásdís eitt. 
  • Tryggvi Þórisson skoraði ekki mark fyrir Såvehof þegar liðið vann Guif, 37:28, í sænsku úrvalsdeildinni í gær. Tryggvi kom fyrst og fremst við sögu í vörninni og var tvisvar vísað af leikvelli. Såvehof er í öðru sæti með 21 stig eftir 13 leiki og er tveimur stigum á eftir Kristianstad sem er efst eftir 12 leiki.
  • Viktor Máni Matthíasson skoraði þrjú mörk og Egill Már Hjartarson tvö þegar lið þeirra, StÍF, tapaði með tveggja marka mun, 34:32, fyrir meisturum H71 í Hoyvíkshøllinni í færeysku úrvalsdeildinni í handknattleik karla í gær. StÍF er i fimmta sæti deildarinnar af sjö liðum með fimm stig þegar átta umferðum er lokið. H71 er í þriðja sæti deildarinnar
  • Kyndill tapað fyrir Neistanum, 29:27, í úrvalsdeild kvenna í handknattleik í Færeyjum í gær. Jakob Lárusson er þjálfari Kyndils sem hafði leikið 10 leiki í röð án taps þegar kom að uppgjöri Þórshafnarliðanna í gær. Kyndill er í öðru sæti deildarinnar með 13 stig eftir átta leiki og er tveimur stigum á eftir H71 en stigi á undan Neistanum. 
  • EB frá Eiði, sem Kristinn Guðmundsson þjálfar, tapaði á heimavelli fyrir VÍF, 29:36, í áttundu umferð færeysku úrvalsdeildarinnar í kvennaflokki í gær. Þetta var áttunda tap EB sem rekur lestina í deildinni án stiga. 
  • Storhamar vann Fana, 34:20, í fyrsta leik sínum í norsku úrvalsdeildinni í handknattleik í kvenna eftir að þráðurinn var tekinn upp eftir Evrópumeistaramótið sem lauk um síðustu helgi. Axel Stefánsson er annar þjálfara Storhamar sem er í fimmta sæti deildarinnar með sjö stig eftir sex leiki.
- Auglýsing -
- Auglýsing -

Nýjustu fréttir

- Auglýsing -