- Auglýsing -
- Sigurður Hjörtur Þrastarson og Svavar Ólafur Pétursson dæmdu viðureign Benfica og ungverska liðsins Fejer B.A.L.Veszprém í A-riðli Evrópudeildarinnar í handknattleik karla í gær. Leikurinn fór fram í Lissabon og vann Benfica með fjögurra marka mun, 39:35.
- Kristján Halldórsson var eftirlitsmaður á leik Granolles og Alpla Hard í C-riðli Evrópudeildarinnar í handknattleik sem fram fór í Granolles á Spáni í gær. Hann var ekki eini Íslendingurinn sem tók þátt í leiknum. Hannes Jón Jónsson er þjálfari Alpla Hard og Sigtryggur Daði Rúnarsson leikur með liðinu. Hann skoraði fimm mörk í tíu marka tapi, 38:28.
- Gísli Þorgeir Kristjánsson og Ómar Ingi Magnússon komu ekki mikið við sögu í gærkvöld þegar SC Magdeburg vann Eulen Ludwigshafen, 35:30, í síðasta leik 32-liða úrslita þýsku bikarkeppninnar í handknattleik karla. Leiknum var frestað í byrjun vetrar vegna þátttöku Magdeburg í heimsmeistaramóti félagsliða. Gísli Þorgeir skoraði eitt mark en Ómar Ingi ekkert. Hollendingurinn Kay Smits skoraði níu mörk og var markahæstur hjá Magdeburg sem mætir Bergischer HC 16-liða úrslitum bikarkeppninnar á heimavelli 21. desember.
- Ribe-Esbjerg tapaði illa á heimavelli í gær fyrir Holstebro í dönsku úrvalsdeildinni í handknattleik karla, 32:23, í síðasta leik 14. umferðar. Ágúst Elí Björgvinsson varði 10 skot, 32%, í marki Ribe-Esbjerg, og var með betri leikmönnum liðsins. Arnar Birkir Hálfdánsson skoraði tvö mörk og Elvar Ásgeirsson eitt mark. Halldór Jóhann Sigfússon er aðstoðarþjálfari Holstebro sem komið er upp í sjötta sæti deildarinnar. Ribe-Esbjerg er á hinn bóginn í áttunda sæti.
- Simon Dahl tekur við af Arnóri Atlasyni sem aðstoðarþjálfari Aalborg Håndbold við upphaf næsta keppnistímabilsins. Eins og kom fram í haust tekur Arnór við sem þjálfari TTH Holstebro á næstu leiktíð. Dahl er álitinn einn af efnilegri þjálfurum Danmerkur og starfar hjá úrvalsdeildarliðinu Nordsjælland Håndbold hvar hann hefur gert það gott.
- Auglýsing -
