- Auglýsing -
- Sigurjón Friðbjörn Björnsson sem var í þjálfarateymi kvennaliðs Stjörnunnar með Rakel Dögg Bragadóttur er hættur störfum. Rakel Dögg hætti fyrir um hálfum mánuði. Sigurjón Friðbjörn vann áfram en hætti í kjölfar þess að Hrannar Guðmundsson var ráðinn þjálfari Stjörnuliðsins í síðustu viku.
- Danski landsliðsmaðurinn Mathias Gidsel leikur ekki fleiri leiki á þessari leiktíð eftir að hafa slitið aftara krossband í öðru hné eftir aðeins eina mínútu í viðureign Dana og Frakka um bronsverðlaunin á EM í handknattleik karla á sunnudaginn. Meiðslin eru einnig mikið áfall fyrir danska liðið GOG þar sem Gidsel hefur verið ein kjölfestan. Gidsel flytur til Berlínar í sumar þar sem hann hefur samið við Füchse Berlin.
- Öllum hömlum á æfingum og keppni barna, unglinga og fullorðinna í handknattleik hefur verið aflétt í Noregi. Þar með getur keppni hafist fljótlega á nýjan leik en hún hefur legið niðri síðustu vikur nema í úrvalsdeild kvenna. Engar takmarkanir verða á fjölda áhorfenda í íþróttahöllum sem bjóða upp á sæti og grímuskylda áhorfenda hefur verið felld niður.
- Kåre Geir Lio, formaður norska handknattleikssambandsins sagðist vera himinlifandi með að hömlum hafi verið aflétt. „Ég væri ekki glaðari þótt við hefðum unnið stórmót í handknattleik,“ sagði Lio í frétt á vef norska handknattleikssambandsins.
- Danski landsliðsmarkvörðurinn og liðsmaður THW Kiel, Niklas Landin, var kjörinn leikmaður ársins í þýska handknattleiknum leiktíðina 2020/2021 af lesendum tímaritsins Handballwoche. Johannes Golla, leikmaður Flensburg og fyrirliði þýska landsliðsins varð í öðru sæti og Hendrik Pekeler samherji Landin hjá Kiel varð í þriðja sæti.
- Auglýsing -
