- Auglýsing -
- Sigvaldi Björn Guðjónsson skoraði sex mörk fyrir Kolstad þegar liðið vann Runar með 10 marka mun, 36:26, í níundu umferð norsku úrvalsdeildarinnar í handknattleik í gær. Leikið var á heimavelli Kolstad í Þrándheimi. Janus Daði Smárason skoraði ekki mark fyrir Kolstad en átti hinsvegar níu stoðsendingar. Kolstad er efst í deildinni með 18 stig, er fjórum stigum á undan Drammen sem lokið hefur 10 leikjum.
- Haukur Þrastarson skoraði tvisvar sinnum fyrir Łomża Industria Kielce í 15 marka sigri á Azoty Puławy í níuna sigurleik Łomża Industria Kielce í pólsku 1. deildinni í handknattleik í gærkvöld, 30:24. Orlen Wisła Płock er efst í deildinni með 30 stig eftir 10 leiki en Haukur og félagar hafa 27 stig en eiga leik til góða á Plockliðið.
- Kristján Örn Kristjánsson, Donni, var ekki í leikmannahópi PAUC í gærkvöld þegar liðið vann Sélestat, 40:34, í 16-liða úrslitum frönsku bikarkeppninnar. Donni er meiddur á ökkla. Grétar Ari Guðjónsson var í marki Sélestat hluta leiksins og varði sex skot, 17%.
- Aron Pálmarsson var fjarverandi vegna veikinda þegar Aalborg vann Nordsjælland, 31:25, í 13. umferð dönsku úrvalsdeildarinnar í handknattleik í gærkvöld. Aalborg er efst í deildinni sem fyrr með 25 stig eftir sigurinn í gær. Arnór Atlason var að vanda Stefan Madsen þjálfara Aalborg til halds og trausts.
- Einar Þorsteinn Ólafsson skoraði eitt mark og átti eina stoðsendingu þegar Fredericia Håndboldklub tapaði á útivelli fyrir Skanderborg Aarhus Håndbold, 33:25, í dönsku úrvalsdeildinni í gærkvöld. Fredericia Håndboldklub, sem Guðmundur Þórður Guðmundsson þjálfar, er í sjöunda sæti deildarinnar með 13 stig eftir 13 leiki. Skanderborg Aarhus Håndbold er stigi á eftir.
- Viggó Kristjánsson er í úrvalsliði 12. umferðar þýsku 1. deildarinnar í handknattleik. Seltirningurinn fór á kostum þegar Leipzig vann Hamm, 33:23. Viggó skoraði níu mörk og var með fullkomna nýtingu. Einnig átti hann fjórar stoðsendingar. Þetta er í fyrsta sinn á leiktíðinni sem Viggó á sæti í liði umferðarinnar.
- Auglýsing -
