- Auglýsing -
- Steinunn Hansdóttir hefur framlengt samning sinn við danska úrvalsdeildarliðið Skanderborg Håndbold til eins árs, út leiktíðina 2023. Félagið greindi frá þessu í tilkynningu í gær. Steinunn kom aftur til Skanderborg-liðsins á síðasta sumri eftir að hafa spreytt sig annars staðar. Hún hefur leikið 36 A-landsleiki og skoraði í þeim 50 mörk.
- Sænska handknattleikskonan Isabelle Gulldén hefur nýtt sér uppsagnarákvæði í samningi sínum við norsku Evrópumeistarana Vipers Kristiansand. Gulldén kom til félagsins á síðasta sumri og kveður það í vor þegar keppnistímabilinu lýkur. Hún segir persónulegar ástæður liggja að baki ákvörðun sinni en vitað er að sænsk félög hafa borið víur sínar í Gulldén sem er þekktasta handknattleikskona Svía á síðari árum.
- Danska handknattleiksliðið Vendsyssel Håndbold, sem Elín Jóna Þorsteinsdóttir landsliðsmarkvörður lék með um árabil, hefur óskað eftir gjaldþrotaskiptum. Steinunn Hansdóttir sem getið er um að ofan lék með Vendsyssel á síðasta vetri. Allir leikir liðsins í næst efstu deild á keppnistímabilinu hafa verið strikaðir út. Vendsyssel lék í úrvalsdeildinni leiktíðina 2020/2021 en féll á síðasta vori. Leikmenn eru lausir undan samningum sínum.
- Heimsmeistarar Danmerkur og Evrópumeistarar Svía í handknattleik karla mætast í vináttulandsleik í Malmö Arena laugardaginn 16. apríl í vor. Hvorugt landsliðið þarf að taka þátt í umspilsleikjum fyrir HM. Þar með var ákveðið að slá upp vináttulandsleik á milli grannþjóðanna. Danir leika vináttuleik við Pólverja í Kaupmannahöfn tveimur dögum fyrir leikinn í Malmö.
- Sænski landsliðsmaðurinn Hampus Wanne hefur ákveðið að kveðja þýska liðið Flensburg í sumar eftir níu ára dvöl. Ekki er vitað hvert hugur hans stefnir. Væntanlega skýrist það á næstu dögum enda er Wanne einn öflugasti hornamaður Evrópu um þessar mundir. Fyrir áramót var Wanne orðaður við Barcelona.
- Spænski handknattleiksmaðurinn Cristian Ugalde hefur samið við ungverska liðið Tatabánya frá og með næstu leiktíð. Ugalde, sem er 34 ára gamall, hefur verið flakki síðustu árin eftir að hafa leikið með Veszprém og Barcelona. Nú um stundir er hann leikmaður AEK í Aþenu. Ugalde hefur leikið 131 landsleik fyrir Spán.
- Auglýsing -
