- Auglýsing -
- Viktor Petersen Norberg skoraði þrjú mörk og Óskar Ólafsson eitt þegar lið þeirra Drammen vann Viking frá Stavangri, 35:23, í norsku úrvalsdeildinni í handknattleik í gær. Leikið var í Drammenshallen. Með sigrinum færðist Drammen-liðið upp í þriðja sæti úrvalsdeildarinnar. Liðið hefur nú níu stig að loknum sex leikjum og er þremur stigum á eftir Elverum sem trónir á toppnum með 12 stig. ÖIF Arendal er með 11 stig í öðru sæti. Bækkelaget er með níu stig eins og Drammen en hefur leikið einum leik fleira. Elverum tapaði óvænt í gær fyrir Haslum á útivelli, 31:23.
- Aðalsteinn Eyjólfsson stýrði Kadetten Schaffhausen til stórsigurs á Wacken Thun, 36:20, í svissnesku 1. deildinni í fyrrakvöld. Aðeins 11 leikmenn mættu til leiks af hálfu Wacker Thun. Þeir héldu ekki dampi nema í fyrri hálfleik. Kadetten vann síðari hálfleik, 23:10, og er í öðru sæti deildarinnar með 12 stig, stigi á eftir HC Kriens en stigi á undan Suhr Aarau.
- Baldvin Fróði Hauksson tók í sumar við þjálfun norska kvennaliðsins Junkeren í Bodö í Noregi. Liðið er skráð til leiks í C-deildinni en því miður er keppni ekki hafin enn vegna kórónuveirunna. Vonir standa til þess að hægt verði að flauta til leiks í desember en um tíma leit út fyrir að keppni hæfist í lok þessa mánaðar. Baldvin Fróði þjálfar handbolta í menntaskóla (NTG).
- Auglýsing -
