Sigurður Hjörtur Þrastarson og Svavar Ólafur Pétursson dæmdu í Tallinn í Eistlandi í gærkvöld. Mynd/EHF
- Auglýsing -
Svavar Ólafur Pétursson og Sigurður Hjörtur Þrastarson dæmdu viðureign Eistlands og Litáen í 1. riðli undankeppni EM karla í handknattleik sem fram fór í Tallin í gærkvöld. Litáar unnu granna sína, 30:20.
Hlynur Leifsson var eftirlitsmaður á viðureign Lúxemborgar og Belgíu í undankeppni EM karla, 5. riðli, sem fram fór í Lúxemborg í gærkvöld. Belgar unnu leikinn með 10 marka mun, 32:22.
Dana Björg Guðmundsdóttir skoraði þrjú mörk fyrir Volda þegar liðið tapaði fyrir Storhamar2 í næst efstu deild norska handknattleiksins í gær, 26:23, á heimavelli. Volda er engu að síður áfram efst í deildinni með 39 stig eftir 22 leiki. Fjellhammer sem Birta Rún Grétarsdóttir leikur með hefur einnig 39 stig að loknum 22 leikjum en Volda stendur betur að vígi í innbyrðisleikjum. Aker er skammt á eftir með 36 stig auk þess að eiga leik inni á Volda og Fjellahammer.
Birta Rún var ekki á meðal þeirra sem skoraði fyrir Fjellhammer í gær í sigri á Glassverket á útivelli, 31:20. Volda og Fjellhammer eiga fjóra leiki eftir hvort en aðeins eitt lið fer beint upp í úrvalsdeild, liðin sem hafna í öðru og þriðja sæti taka þátt í umspili um sæti í úrvalsdeildinni.
Storhamar er áfram efst í úrvalsdeild kvenna. Liðið vann Romerike Ravens, 37:25, á heimavelli í gær. Axel Stefánsson var að vanda í þjálfarateymi Storhamar í gær en hann endurnýjaði kynnin við liðið í lok síðasta árs eftir nokkurra mánaða fjarveru.
Berta Rut Harðardóttir skoraði þrjú mörk og Jóhanna MargrétSigurðardóttir eitt þegar lið þeirra, Kristianstad, vann Kungälvs, 29:24, í sænsku úrvalsdeildinnni í handknattleik í gærkvöld í síðasta leik 20. umferðar. Kristanstad færðist upp í 7. sæti deildarinnar með sigrinum en liðið hefur sótt verulega í sig veðrið eftir áramótin.
