- Auglýsing -
- Skjern vann Fredericia Håndboldklub með átta mark mun á heimavelli sínum, 37:29, í 16. umferð dönsku úrvalsdeildarinnar í gær og er þar með áfram í fimmta sæti með 21 stig eftir 16 leiki. Sveinn Jóhannsson kom lítið sem ekkert við sögu hjá Skjern. Svipaða sögu er að segja af Einari Þorsteini Ólafssyni leikmanni Fredericia Håndboldklub. Liðið er í áttunda sæti með 16 stig. Guðmundur Þórður Guðmundsson er þjálfari Fredericia Håndboldklub.
- Elvar Ásgeirsson skoraði tvö mörk og átti þrjár stoðsendingar þegar Ribe-Esbjerg tapaði óvænt fyrir Nordsjælland, 35:32, á útivelli í dönsku úrvalsdeildinni í handknattleik í gær. Ágúst Elí Björgvinsson stóð verulegan hluta leiksins í marki Ribe-Esbjerg og varði átta skot, 22%. Hann skoraði einnig tvö mörk. Arnar Birkir Hálfdánsson skoraði ekki mark fyrir Ribe-Esbjerg en liðið er í níunda sæti með 14 stig að loknum 16 leikjum.
- Sigtryggur Daði Rúnarsson skoraði ekki mark en átti tvær stoðsendingar fyrir Alpla Hard í gær þegar liðið tapaði fyrir SC Ferlach, 29:25, á útivelli í austurrísku 1. deildinni í handknattleik. Hannes Jón Jónsson er þjálfari Hard sem var marki yfir í hálfleik, 13:12. Hard er í öðru sæti deildarinnar með 19 stig að loknum 12 leikjum og er þremur stigum á eftir Krems sem trónir á toppnum.
- Haukur Þrastarson skoraði tvisvar sinnum fyrir Łomża Kielce í gær í 22 marka sigri á útivelli á KPR Arged Ostrovia, 45:23, í pólsku úrvalsdeildinni í handknattleik. Łomża Kielce er efst í deildinni með 36 stig eftir 12 leiki eins og Wisla Plock en gefin eru þrjú stig fyrir sigur. Liðin tvö eru 12 stigum á undan Zabrze sem situr í þriðja sæti.
- Sveinbjörn Pétursson átti stórleik og varði 15 skot þegar lið hans EHV Aue vann ungmennalið SC Magdeburg, 33:22, í einum af riðlum 3. deildar þýska handknattleiksins í gærkvöld. Leikurinn fór fram í gömlu góðu Hermann-Gieseler-Halle í Magdeburg þar sem íslenska landsliðið í handknattleik karla lék sinn fyrsta leik á heimsmeistaramóti árið 1958.
- Auglýsing -
