- Auglýsing -
- Sylvía Sigríður Jónsdóttir hefur framlengt samningnum sínum við handknattleiksdeild ÍR um tvö ár. Sylvía, sem getur leyst allar stöður fyrir utan, skoraði 33 mörk í 11 leikjum. Með spilamennsku sinni vann hún sér sæti í keppnishóp U19 ára landsliðsins fyrr í vetur en varð fyrir því óláni að meiðast á ökkla rétt fyrir brottför. Sylvía Sigríður verður tilbúin í slaginn með nýliðum ÍR í Olísdeildinni þegar nýtt keppnistímabil hefst í september. Hún er ein margra leikmanna ÍR-liðsins sem hafa endurnýjað samninga sína við félagið á síðustu vikum.
- Tryggvi Þórisson og samherjar hans í IK Sävehof máttu gera sér að góðu að taka við silfurverðlaunum eftir tap fyrir IFK Kristianstad, 30:23, í fimmta og síðasta úrslitaleik liðanna um sænska meistaratitilinn í handknattleik karla í gær. Leikurinn fór fram í Kristianstad. Þetta er fyrsti meistaratitill Kristianstad í fimm ár. Liðið varð einnig deildarmeistari.
- Tryggvi skoraði ekki marki í leiknum í Kristianstad en kom nokkuð við sögu í vörninni. Elias Ellefsen á Skipagøtu var markahæstur hjá Sävehof með sex mörk. Þetta var hans síðasti leikur fyrir félagið en Færeyingurinn gengur til liðs við THW Kiel í sumar.
- Aldís Ásta Heimisdóttir staðfesti við handbolta.is að hún leikur áfram með sænska úrvalsdeildarliðinu Skara HF á næsta keppnistímabili. Aldís Ásta gekk til liðs við Skara fyrir ári síðan og náði sér afar vel á strik og var á meðal bestu leikmanna liðsins sem hafnaði í 7. sæti deildarinnar. Auk Aldísar Ástu leikur Jóhanna Margrét Sigurðardóttir áfram með liðinu til viðbótar sem Katrín Tinna Jensdóttir bætist í hópinn eftir tveggja ára dvöl hjá Volda í Noregi.
- Györ var ungverskur meistari í handknattleik kvenna á laugardaginn eftir sigur á Mosonmagyarovar, 30:26, í síðustu umferð 1. deildar. Györ vann 25 af 26 leikjum tímabilsins og varð tveimur stigum á undan FTC en liðin tvö höfðu talsverða yfirburði á leiktíðinni eins og undanfarin tímabil.
- Auglýsing -
