- Auglýsing -
- Teitur Örn Einarsson skoraði tvö mörk og átti þrjár stoðsendingar þegar Flensburg-Handewitt vann HSV Hamburg örugglega, 35:28, í 16-liða úrslitum þýsku bikarkeppninnar í gærkvöld. Leikurinn fór fram í Flens-Arena.
- Hannover-Burgdorf, en Heiðmar Felixson er aðstoðarþjálfari liðsins, vann Dessau-Roßlauer HV 06, 29:27, í Anhalt-Arena, heimavelli Dessau-Roßlauer. Heimaliðið gaf sinn hlut svo sannarlega ekki eftir átakalaust en það á sæti í næst efstu deild. Wetzlar og Kiel náðu einnig inn í átta liða úrslit í gærkvöld.
- Kadetten Schaffhausen, sem Aðalstein Eyjólfsson þjálfar, komst í gærkvöld í átta liða úrslit svissnesku bikarkeppninnar með sigri á Pfadi Winterthur á heimavelli, 32:30. Óðinn Þór Ríkharðsson skoraði sex mörk í átta tilraunum og var næst markahæstur liðsmanna Kadetten.
- Ólafur Andrés Guðmundsson komst einnig í átta liða úrslit með GC Amicitia Zürich eftir þriggja marka sigur á TSV St. Otmar St. Gallen, 33:30. Ólafur Andrés var utan liðs í gær væntanlega vegna meiðsla.
- Sænski handknattleiksmaðurinn Christoffer Brännberger hefur verið úrskurðaður í leikbann til loka deildarkeppninnar í sænsku úrvalsdeildinni en ráðgert er að henni ljúki 31. mars. Brännberger varð á dögunum uppvís af afar grófum leik með liði sínu Önnereds í sænsku deildinni. Hann hefur nýlega lokið afplánun á 11 leikja banni.
- Danski hornamaðurinn Emil Jakobsen hefur framlengt samning sinn við Flensburg til ársins 2026. Hann kom til félagsins frá GOG sumarið 2021 og hefur gert það gott síðan, ekki síst í vetur eftir að Svíinn Hampus Wanne gekk til liðs við Barcelona.
- Spænski landsliðsmarkvörðurinn Rodrigo Corrales er svo sannarlega ekki á leiðinni frá Veszprém í Ungverjalandi. Hann hefur framlengt veru sína hjá félaginu til ársins 2026. Corrales kom til Veszprém sumarið 2020.
- Evrópumeistarar Barcelona hafa keypt Pol Valera frá Granolles. Hann kemur til félagsins í byrjun janúar og á að hlaupa í skarðið fyrir Frakkann Timothey N’Guessan sem verður frá keppni eitthvað fram eftir ári vegna meiðsla.
- Bræðurnir og ungstirnin Martim og Kiko Costa hafa framlengt samninga sína við Sporting Lissabon til ársins 2027.
- Auglýsing -
