- Auglýsing -
- Teitur Örn Einarsson var næst markahæstur hjá Flensburg í gærkvöld þegar liðið gerði jafntefli við ungverska liðið FTC, 27:27, í síðustu umferð Evrópudeildarinnar í handknattleik karla. Teitur Örn skoraði 27. mark Flensburg og kom liðinu tveimur mörkum yfir þegar 37 sekúndur voru til leiksloka. Leikmenn FTC náðu að skora tvö mörk á síðustu sekúndunum og tryggja sér annað stigið og fjórða sætið í riðlinum. Flensburg var fyrir öruggt um efsta sætið.
- Kristján Halldórsson var eftirlitsmaður á viðureign danska liðsins Skjern og Balatonfüredi frá Ungverjalandi í C-riðli Evrópudeildar karla í handknattleik sem fram fór í Skjern á Jótlandi í gærkvöld.
- Daníel Freyr Andrésson varði níu skot, 50%, þann tíma sem hann var í marki Lemvig í gegn Mors Thy í dönsku úrvalsdeildinni í handknattleik í gær. Þar af varði Daníel Freyr tvö af þremur vítaköstum sem hann spreytti sig í að verja. Frammistaða Hafnfirðingsins nægði Lemvig skammt. Liðið tapaði með átta marka mun, 26:18. Lemvig er næst neðst með 12 stig eftir 22 leiki og missti m.a. Mors stigi upp fyrir sig.
- Sonni Larsen þjálfari kvennalandsliðsins í Færeyjum hefur sagt starfi sínu lausu og ráðið sig til karlaliðs Viking TIF í Noregi en liðið leikur í B-deildinni. Meðan leit stendur yfir að nýjum þjálfara mun Finnur Hanson stýra landsliðinu ásamt Mark Lausen-Marcher íþróttastjóra færeyska handknattleikssambandsins. Finnur var aðstoðarmaður Larsen. Næsti leikur færeyska landsliðsins verður vináttuleikur við Finna um miðjan apríl.
- Rússneska meistaraliðið í kvennaflokki, Rostov Don, sagði Eduard Koksharov þjálfara upp störfum í gær. Koksharov er einn af þekktari handknattleiksmönnum Rússa á síðari árum og var frábær vinstri hornamaður á sinni tíð. Hann tók við þjálfun Rostov Don á síðasta ári. Liðið stóð ekki undir væntingum undir stjórn Koksharov og hann mátti þar með hirða hinn margumtalaða poka.
- Forráðamenn Füchse Berlin hafa skipt um skoðun. Nú vilja þeir halda danska landsliðsmanninum Hans Lindberg í eitt ár til viðbótar. TV2 í Danmörku hefur þetta samkvæmt heimildum. Í október tilkynnti Berlínarliðið að það ætlaði ekki að bjóða Lindberg nýjan samning þegar núverandi samningur gengur út vorið 2023. Lindberg hefur verið orðaður við danska B-deildarliði HØJ Elite en forráðamenn þessa hafa í hyggju að spýta í lófana og koma sér upp úrvalsdeildarliði á næstu árum.
- Auglýsing -
