- Auglýsing -
- Teitur Örn Einarsson skoraði fimm mörk, þar af eitt úr vítakasti, þegar lið hans IFK Kristianstad tapaði naumlega fyrir Redbergslid, 30:29, í sænsku úrvalsdeildinni í handknattleik í gærkvöld. Teitur Örn jafnaði metin, 29:29, úr vítakasti þegar 18 sekúndur voru til leiksloka. Hinn efnilegi Elliot Stenmalm skoraði sigurmark Redbegslid fjórum sekúndum fyrir leikslok. Stenmalm þykir mikið efni og vakti verðskuldaða athygli með sænska landsliðinu á EM 19 ára landsliða í Króatíu í síðasta mánuði. M.a. var hann valinn í úrvalslið mótsins.
- Franski handknattleiksmaðurinn Luc Abalo hefur samið við japanska liðið Zeekstar Tokyo um að leika með liðinu á komandi leiktíð. Abalo var á síðustu leiktíð með Elverum í Noregi en lék aðeins nokkra leiki á útivelli í Meistaradeild Evrópu eftir heimsmeistaramótið í Egyptalandi í janúar. Keppni lagðist af í norsku úrvalsdeildinni í byrjun árs auk þess sem Frakkinn komst ekki til Noregs vegna strangra sóttvarnarreglna og skorts á norskri kennitölu. Abalo lék engu að síður með franska landsliðinu á Ólympíuleikunum í sumar og hreppti gullverðlaun.
- Forráðamenn danska úrvalsdeildarliðsins Skjern, sem hefur komið við sögu íslenskra handknattleiksmanna á síðustu árum leitar nú að þjálfara sem getur tekið við þjálfun liðsins á næsta sumri. Claus Dalgaard-Hansen núverandi þjálfari og sá sem tók við af Patreki Jóhannessyni í febrúar 2020, ætlar að hætta með liðið í vor og snúa sér að þjálfun yngri liða félagsins, starfi sem hann sinnti áður en hann tók við þjálfun á liði fullorðinna.
- Danski handknattleiksþjálfarinn, Jan Leslie, sem óvænt var sagt upp störfum hjá CSKA Moskvu í vor rétt áður en liðið tók þátt í úrslitahelgi Meistaradeildar Evrópu í kvennaflokki í fyrsta sinn, hefur tekið við þjálfun kvennaliðs Horsens í dönsku úrvalsdeildinni. Forráðamenn Horsens sögðu þjálfaranum sem hóf leiktíðina með liðið upp störfum í síðustu viku eftir tap í þremur fyrstu leikjum deildarinnar.
- Hornamaðurinn Stefán Hinriksson hefur samið við Vængi Júpiters sem leika í Grill66-deild karla á keppnistímabilinu. Flautað verður til leiks í deildinni eftir um viku.
- Auglýsing -
