- Auglýsing -
- Elín Jóna Þorsteinsdóttir og Steinunn Hansdóttir, leikmenn Vendsyssel, fá nýjan þjálfara fyrir næsta keppnistímabil. Thomas Kjær sem tók við þjálfun liðsins í október verður ekki áfram við stjórnvölinn. Vendsyssel er fallið úr úrvaldsdeildinni í Danmörku eftir eins árs veru. Forráðamaður félagsins sagði við danska fjölmiðla um helgina að leit stæði yfir að þekktum þjálfara sem gæti laðað góða leikmenn að liðinu. Stefna félagsins væri að fara rakleitt upp í úrvalsdeild á nýjan leik.
- Magnus Saugstrup hefur orðið að draga sig út úr danska landsliðinu sem tekur þátt í tveimur leikjum við Norður-Makedóníu í vikunni í undankeppni EM2022. Saugstrup er smitaður af kórónuveirunni. Í hans stað hefur Nikolaj Jacobsen landsliðsþjálfari Dana valið René Antonsen, samherja Saugstrup hjá Aalborg.
- Max Darj varð af persónulegum ástæðum að draga sig út úr sænska landsliðinu fyrir leiki í undankeppni EM í vikunni. Sömu sögu er að segja af Lukas Sandell. Hann varð að hætta við þátttöku í landsliðinu eftir að hafa smitast af kórónuveirunni. Glenn Solberg landsliðsþjálfari valdi Oscar Bergendahl í staðinn. Svíar eiga fyrir höndum leik við Svartfellinga í undankeppni EM.
- Svíinn Johan Zanotti hefur verið ráðinn landsliðsþjálfari Grænlendinga í handknattleik karla til næstu þriggja ára. Zanotti er þjálfari danska B-deildarliðsins Team Sydhavsøerne. Hann hefur áður þjálfað yngri landslið Noregs og Svíþjóðar.
- Auglýsing -
