- Auglýsing -
- Þórir Hergeirsson er einn þeirra sem tilnefndur er í vali á þjálfara ársins 2022 í Noregi sem afhent verða á hátíðarkvöldi norska íþróttasambandsins sem fram fer í Hamri 7. janúar. Þórir var kjörinn þjálfari ársins á Íslandi á dögunum. Kvennalandsliðið í handknattleik, sem Þórir þjálfar, er tilnefnt í flokki liða ársins auk þess sem þrír leikmenn eru útnefndir í nokkrum flokkum sem verðlaunað verður fyrir á hátíðinni næsta laugardag. Norska kvennalandsliðið varð Evrópumeistari í lok nóvember.
- „Ef við leikum vel þá getum við farið alla leið á mótinu,“ segir Nikolaj Jacobsen landsliðsþjálfari Dana í samtali við danska ríkissjónvarpið spurður um möguleika Dana á að verja heimsmeistaratitilinn sem þeir hafa unnið á tveimur síðustu mótum. „Okkur er ljóst að við erum á meðal sigurstranglegri liða á mótinu,“ sagði Jacobsen ennfremur og er ekki feiminn við að fela markmið sín og danska landsliðsins á HM sem hefst 11. janúar en Danir eiga sinn fyrsta leik á mótinu tveimur dögum síðar.
- Emmanuel Mayonnade, fyrrverandi landsliðsþjálfari Hollendinga í handknattleik kvenna, hefur framlengt samning sinn við franska meistaraliðið Metz fram til ársins 2024. Metz er sem stendur í öðru sæti frönsku 1. deildarinnar í kvennaflokki, einu stigi og einum leik á eftir Brest. Mayonnade, sem er 39 ára gamall, hefur þjálfað Metz frá 2015. Hann stýrði hollenska landsliðinu til sigurs á HM 2019 en hætti þjálfun landsliðsins tveimur árum síðar og hefur síðan einbeitt sér að þjálfun franska félagsliðsins.
- Auglýsing -
