- Auglýsing -
- Tryggvi Þórisson og samherjar í IK Sävehof leika til úrslita um sænska meistaratitilinn í handknattleik. Þeir unnu Ystads IF HF, 37:27, á heimavelli í gær og unnu þar með einvígið 3:0 í vinningum talið. Tryggvi skoraði ekki í leiknum í gær. Ystads IF HF varð sænskur meistari fyrir ári. IK Sävehof mætir annað hvort Kristianstad eða Hammarby í úrslitum. Einvígi þeirra er ekki lokið en Kristianstad stendur betur að vígi eftir þrjá leiki. Fjórði leikurinn fer fram í Stokkhólmi í kvöld.
- Bjarki Már Elísson skoraði heldur ekki fyrir Veszprém í gær þegar liðið gerði jafntefli við pólska meistaraliðið Barlinek Industria Kielce, 29:29, á heimavelli í fyrri viðureign liðanna í átta liða úrslitum Meistaradeildar Evrópu. Síðari viðureignin verður á miðvikudaginn í Póllandi. Barcelona vann GOG, 37:30, í hinni viðureign gærkvöldsins í átta liða úrslitum.
- Teitur Örn Einarsson skoraði eitt mark og átti eina stoðsendingu þegar Flensburg vann stórsigur á GWD Minden í þýsku 1. deildinni í handknattleik í gærkvöld, 41:27. Leikurinn fór fram í Minden. Sveinn Jóhannsson skoraði þrjú mörk fyrir Minden. Flensburg er í fjórða sæti deildarinnar með 43 stig eftir 29 leiki. Liðið er fjórum stigum á eftir Kiel, Magdeburg og Füchse Berlin sem eru jöfn í þremur efstu sætunum. Berlinarliðið lagði Erlangen, 39:30, í Berlín í gærkvöld.
- Lærisveinar Rúnar Sigtryggssonar í Leipzig töpuðu fyrir Göppingen, 34:30, á útivell í þýsku 1. deildinni í gær. Leipzig er í 13. sæti af 18 liðum deildarinnar.
- Annika Fríðheim Petersen landsliðsmarkvörður Færeyja sem lék með Haukum um árabil hefur samið við norska úrvalsdeildarliðið Follo HK frá og með næsta keppnistímabili. Annika Fríðheim hefur frá því í febrúar á síðasta ári leikið með Nykøbing Falster í dönsku úrvalsdeildinni.
- Fjórir af öflugri leikmönnum franska liðsins Montpellier, Valentin Porte, Yanis Lenne, Alexis Berthier og Arthur Lenne hafa allir framlengt samninga sína við félagið til ársins 2027. Montpellier er í þriðja sæti frönsku 1. deildarinnar þegar fjórar umferðir eru eftir, tveimur stigum á eftir PSG sem trónir á toppnum.
- Hollenski landsliðsmarkvörðurinn, Tess Lieder, hefur samið við þýska liðið Borussia Dortmund til tveggja ára frá og með næsta tímabili. Lieder hefur verið landsliðsmarkvörður Hollendinga árum saman og varð m.a. í sigurliði Hollands á HM 2019. Lieder lék síðast með CSM Bucuresti leiktímabilið 2021/2022 en hefur verið í fæðingaorlofi síðast liðnu ári. Lieder bar áður eftirnafnið Wester en tók upp eftirnafnið Lieder eftir að hafa gifst hollenska knattspyrnumanninum Mart Lieder.
- Auglýsing -
