Molakaffi: Tryggvi, Aron, Lovísa, Ýmir, Teitur, Orri, Harpa, Sunna, Aðalsteinn, Haukur

• Tryggvi Þórisson skoraði tvisvar fyrir Sävehof í gær þegar liðið tapaði með sex mörkum í heimsókn til Alingsås, 33:27, í sænsku úrvalsdeildinni í handknattleik karla. Sävehof hefur þrjú stig eftir þrjá leiki. 

• Aron Pálmarsson skoraði fjögur mörk og gaf fjórar stoðsendingar þegar Aalborg Håndbold gerði jafntefli við Bjerringbro/Silkeborg, 29:29, í fimmtu umferð dönsku úrvalsdeildarinnar í Álaborg í gær. Aalborg efst í deildinni með níu stig eftir fimm leiki. Meistarar GOG geta náð efsta sætinu í dag takist þeim að leggja lærisveina Guðmundar Þórðar Guðmundssonar í Fredericia Håndbold. 
  
  

• Lovísa Thompson og samherjar í Ringköbing Håndbold unnu sinn fyrsta leik á keppnistímabilinu gær þegar þeir lögðu Ajax, 30:24, á heimavelli. Lovísa kom lítið við sögu í leiknum. 

• Rhein-Neckar Löwen vann Flensburg naumlega í hörkuleik í Mannheim í gær, 28:27, og er þar með enn taplaust í deildinni eftir fimm umferðir. Hvorki Ýmir Örn Gíslason né Teitur Örn Einarsson skoruðu í leiknum sem var sá fyrsti sem Flensborgarliðið tapar í deildinni á nýbyrjaðri leiktíð. 

• Orri Freyr Þorkelsson skoraði átta mörk og var markahæsti leikmaður Elverum þegar liðið vann granna sína í Storhamar, 49:19, í þriðju umferð norsku bikarkeppninnar í gær. 

• Harpa Rut Jónsdóttir skoraði fimm mörk fyrir GC Amicitia Zürich þegar liðið tapaði, 24:19, fyrir  LC Brühl Handball í svissnesku A-deildinni í gær. Sunna Guðrún Pétursdóttir stóð í marki GC Amicitia Zürich stærstan hluta leiksins og varði sex skot,  28%. GC Amicitia Zürich situr í 5. sæti með fjögur stig eftir fjóra leiki. 
  
  
  

• Svissneska meistaraliðið Kadetten Schaffhausen, sem Aðalsteinn Eyjólfsson þjálfar, tapaði öðru sinni á keppnistímabilinu í A-deild karla í gær þegar liðið lá fyrir Pfadi Winterthur, 35:31, á heimavelli. Óðinn Þór Ríkharðsson leikur ekki með Kadetten um þessar mundir vegna ristarbrots sem henti hann fyrir meira en mánuði síðan.

• Haukur Þrastarson var ekki í leikmannahópi Łomża Kielce þegar liðið vann MMTS Kwidzyn, 35:30, á útivelli í pólsku 1. deildinni í handknattleik í gær. 
  

handbolti.is nýtur ekki opin­bers rekstr­­ar­­stuðn­­ings.