- Auglýsing -
- Víða var slegið upp í gær að Henrik Toft Hansen, landsliðsmaður Dana væri með kórónuveiruna sem hann vissulega er með. Það eru hinsvegar ekki ný tíðindi þar sem Toft veiktist um jólin og lék t.d. ekki með PSG í úrslitaleikjum Meistaradeildarinnar 28. og 29. desember af þessu sökum.
- Ales Pajovic hefur framlengt samning sinn sem landsliðsþjálfari Austurríkis í karlaflokki fram á mitt ár 2023. Fyrri samningur hans var til júní á þessu ári. Slóveninn tók við þjálfun austurríska karlalandsliðsins þegar Patrekur Jóhannesson hætti eftir HM fyrir tveimur árum. Austurríska landsliðið getur orðið mótherji íslenska landsliðsins í milliriðlakeppni HM í Egyptalandi.
- Austurríska landsliðið mætir lærisveinum Alfreðs Gíslasonar í þýska landsliðinu í undankeppni EM 2022. Leikið verður í Graz í Austurríki. Þjóðirnar leiða saman hesta sína í sömu keppni í Þýskalandi á laugardaginn.
- Dimitrij Küttel fyrirliði svissneska meistaraliðsins Kadetten Schaffhausen sem Aðalsteinn Eyjólfsson þjálfar, greindist með krabbamein skömmu fyrir jól. Küttel er 26 ára gamall og hefur leikið með Kadetten í átta ár. Einnig á hann að baki 62 landsleiki fyrir landslið Sviss.
- Daniel Kubes og Jan Filip sem stýra landsliði Tékklands liggja báðir veikir af kórónuveirunni. Óvíst er hvort þeir geti farið með liðinu til Egyptalands. Alltént er Kubes svartsýnn. Panvel Pauza þjálfari unglingalandsliðsins og Peter Stocl stýra æfingum landsliðsins um þessar mundir og standa væntanlega í stafni þegar Tékkar hefja leik á HM síðar í þessum mánuði og í kvöld þegar Tékkar mæta Færeyingum í undankeppni EM2022 í Höllinni á Hálsi í Þórshöfn.
- Auglýsing -
